JP word Sharks-senter
2012-02-02 10:00
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg. – JP Pietersen kan vanjaar een van die Sharks se vernaamste aanvalswapens wees; nie as vleuel nie, maar as buitesenter.
John Plumtree, die Sharks se afrigter, het onthul hy gaan met dié Springbok-vleuel eksperimenteer in die middelveld.
Dit sal reeds dié naweek in die Sharks se onderlinge proefwedstryd gebeur.
“Ek stel baie belang om te sien hoe hy (Pietersen) as senter doen. Hy het die lyf en is ’n sterk speler. Op die aanval én verdediging is hy stewig en dan het hy ook hope ervaring.
“Daar sal net ’n aanpassing aan sy werktempo gemaak moet word as hy inskuif senter toe,” het Plumtree gesê.
As Pietersen op senter ’n nuwe tuiste kan vind, beteken dit Plumtree hoef ook nie sy ander twee Bok-vleuels, Odwa Ndungane en Lwazi Mvovo, die heeltyd te roteer nie en kan hulle gereeld vleuel speel.
Plumtree het die volgende paar weke, eers in die proefwedstryd en dan teen die Boland (10 Februarie) en OP Kings (17 Februarie), die kans om te sien wie die beste saam met Pietersen sal kombineer in die middelveld.
Die aanwins uit die Westelike Provinsie, Tim Whitehead, asook Paul Jordaan, wat verlede jaar uitstekende spel vir die o.21’s gelewer het, kan sterk kandidate wees.
Plumtree beskou Jordaan as ’n speler met die X-faktor. “Hy is ’n uitstekende balspeler wat daarvan hou om na aan die aksie te wees.”
Plumtree het dié seisoen die klem verskuif wat sy voorbereiding betref.
Waar daar in die verlede taamlike hoëprofiel-opwarmwedstryde was, neem die Sharks dit rustiger wat hul voorbereidings-wedstryde betref en is daar nou meer klem op kondisionering.
Vir die jongste sportnuus volg Nuus24Sport op Twitter.
– Sport24