'Hou by resep, Cheetahs'
2011-05-09 09:53
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Bloemfontein - Die Cheetahs moet met hul suksesvolle aanvalsresep teen ’n sterk Crusaders-span volhard en nie skroom om hul teenstanders van hul voete af te probeer hardloop nie.
Só sê Hawies Fourie, agterlyn-afrigter van die Cheetahs, oor sy span se Super Rugby-wedstryd Saterdag hier teen die Nieu-Seelanders.
Dié breier meen die sentrale streekspan moenie uit respek vir die Crusaders van sy onlangse aanvallende benadering afwyk nie.
Die Cheetahs het Vrydag ’n sukkelende Lions-span in Johannesburg met 53-19 kafgedraf.
Fourie-hulle het in elk van hul afgelope drie kragmetings, ’n nederlaag van 47-50 teen die Hurricanes, ’n sege van 47-36 oor die Brumbies en die Lions-oorwinning, sowat 50 punte aangeteken.
Hulle het boonop in dié wedstryde 14 drieë – 5 teen die ’Canes, 4 teen die Brumbies en 5 teen die Lions – gedruk en kan selfs die magtige Crusaders probleme besorg.
Volgens Fourie kan die Cheetahs nie bekostig om in hul dop te kruip nie.
“Die Crusaders is een van die beste spanne in die reeks.
“Ons verdediging sal natuurlik bitter goed moet wees en ons moenie bang wees om soos in die laaste paar wedstryde aan te val nie.
“'n Ou moet oppas om, omdat jy teen ’n sterk span speel, nie meer konserwatief te wees nie. Ons moet steeds aanval soos ons kan.”
Die Cheetahs se “towenaars” was in die Goudstad behoorlik op hul stukke. Hul skrumskakel, Sarel Pretorius, en die losskakel, Sias Ebersohn, het goeie rigting gegee, terwyl hul heelagter, Riaan Viljoen, baljaar het.
Viljoen het een van die beste vertonings van sy loopbaan gelewer en is welverdiend met ’n driekuns aan drieë beloon.
“Riaan is ’n ou met besonderse talent. Daar is nie baie spelers wat van nr. 10 tot 15 in die agterlyn kan speel, pale toe kan skop en boonop skepdoele vanuit sy eie helfte kan behaal nie. Ek weet net van Frans Steyn en Riaan Viljoen wat dit kan doen,” sê Fourie.
Die afrigter skryf sy span se goeie aanvallende spel aan vinnige besit en sterk baldraers toe.
“Die grootste verskil is hoe ons baldraers in kontak oorheers en ons vinnige bal kry. Ons eerste drie of vier fases is vinnig en daarom is dit moeilik vir die verdediging.”
Hy meen Pretorius en Ebersohn se aanvalsvernuf hou boonop ook die verdediging deurgaans aan die raai.
Volgens Fourie word dié twee grootliks vrye teuels gegee om hulself uit te druk.
“Een van die uitdagings van afrigting is dat daar ’n balans tussen struktuur en die spelers se eie instinkte moet wees.”
Die Cheetahs-afrigtingspan sal ook tevrede wees met sy spelers se verbeterde verdedigingspoging.
Die besoekers het die eerste keer in ’n lang tyd vir sowat 80 minute met hul lakwerk volgehou en dít is beslis verblydend vir die breiers voor ’n stryd teen die Crusaders.
Vir die jongste sportnuus volg Nuus24Sport op Twitter.
- Sport24