Help tog ’n bietjie, Eddie!
2011-02-17 09:17
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - Eddie Jones het in 2007 die Springbokke gehelp om die Wêreldbeker-toernooi te wen en nou moet hy sy deel vir die Stormers in die Super Rugby-reeks bydra.
Die Kaapse streekspan beplan nou wel nie om hom as konsultant in te span nie, maar hoop hy kan as afrigter van Suntory Sungoliath help om Saterdag die ondergang van Peter Grant se Kobelco Steelers in die halfeindronde van die All Japan-reeks te bewerkstellig.
As die Steelers verloor, is die Stormers se losskakel op ’n vliegtuig terug Kaapstad toe.
As dit dié naweek gebeur, kan Grant aanstaande Saterdag in die Stormers se eerste Super Rugby-wedstryd van die jaar teen die Lions begin. As Grant se span egter wen, moet hy nog op 27 Februarie in die eindstryd speel.
Saterdag se wedstryd sal dus bepaal of Grant van meet af vir die Stormers beskikbaar sal wees en of hy hul kragmeting met die Lions en waarskynlik ook die tweede een teen die Cheetahs sal misloop.
“Ek sal maar vir Eddie ’n boodskap stuur dat hy moet seker maak van ’n sege,” het die Stormers se afrigter, Allister Coetzee, Woensdag gesê.
Hy het terselfdertyd gesê Grant sal vir die Stormers se beginspan teen die Lions oorweeg word as hy betyds terugkeer. “Peter is ’n speler van gehalte, hy ken ons patrone en volg ons kondisioneringsprogram.”
“Die spel het nie só dramaties verander dat hy geïntimideer sal word om op Nuweland in ’n Super Rugby-wedstryd uit te draf nie. Hy is ervare en het ’n verstandhouding met Jean de Villiers, Juan de Jongh, Jaque Fourie, Dewaldt Duvenage en Ricky Januarie.”
Coetzee se ander keuses op losskakel is Gary van Aswegen, Lionel Cronjé en Elgar Watts.
Bly op hoogte van al die jongste sportnuus deur Nuus24Sport op Twitter te volg.
- Sport24