Hawies wil Willie teen Super-span weeg
2012-02-08 08:57
In-diepte Verslae
Die Rebels het wéér vir 'n skok gesorg toe hulle die Waratahs vir die eerste keer in die geskiedenis van die Super-reeks geklop het.
Die Cheetahs se afrigter, Naka Drotské, het die versoeking weerstaan om Heinrich Brüssow in die 15-tal te kies vir die stryd teen die Higlanders.
Bloemfontein. – Die heelagter Willie le Roux het sover in die Cheetahs se oefenwedstryde indruk gemaak, maar sal Saterdag die eerste keer teen ’n ware Super-rugbyspan sy staal moet toon.
Dié oud-Bolander is een van verskeie nuwe gesigte wat in die Cheetahs se beginspan vir hul laaste oefenstryd, teen die Bulls in Polokwane, ingesluit is.
’n Sogenaamde B-span van die Cheetahs speel ook Vrydag in Pretoria teen sy eweknie van die Bulls.
Le Roux, die vleuel Rayno Benjamin, senter Philip Snyman, flank Ashley Johnson en stut Trevor Nyakane sal almal Saterdag in die beginspan uitdraf. Hulle was nie verlede Saterdag teen die Stormers in die beginspan nie.
Die Bulls behoort in Polokwane hul sterkste moontlike span los te laat en juis daarom wil Hawies Fourie, agterlyn-afrigter van die Cheetahs, vir Le Roux teen moeiliker teenstand toets.
Fourie meen hy weet wat hy in Hennie Daniller in die laaste vesting het en daarom kry die 22-jarige Le Roux speelkans.
“Willie het sover meestal as plaasvervanger kans gekry en het verlede jaar in die Curriebeker-reeks se Eerste Liga vir die Boland gespeel.
“Ons wil hom teen ware Super-teenstanders ’n kans gee.
“Hennie het baie goed gespeel. Ons wil Willie op ’n hoër vlak toets en kyk hoe hy dit hanteer,” sê Fourie.
Volgens die afrigter kry Snyman en Benjamin ook kans, aangesien hulle meestal tot dusver plaasvervangers was of teen swakker teenstand gespeel het.
“Daar is groot mededinging op vleuel en senter en ons wil sien wat hulle teen beter spelers doen.”
Snyman ding met Andries Strauss om die nr.12-trui mee, terwyl Benjamin en Dusty Noble sake op die punt uitspook.
Johnson kry weer ’n slag op flank, eerder as agtsteman, kans. Die Cheetahs het dié Springbok dikwels al met vrug in dié posisie ingespan.
Volgens Fourie sal die Cheetahs Vrydag met 25 spelers in Pretoria uitdraf, terwyl slegs ’n 22-tal vir Saterdag gekies gaan word.
Verskeie spelers wat in die Jakarandastad speel, sal ook in Polokwane op die plaasvervangerbank wees.
Die skrumskakel Tewis de Bruyn, wat Donderdag van die Franse klubspan Lyon af teruggekeer het, sal volgens Fourie in Vrydag se kragmeting sowat 60 minute speel.
Die afrigter sê hy sal ook Saterdag ’n plaasvervanger in Polokwane wees.
)Die Cheetahs-beginspan vir Saterdag is:
Willie le Roux, Rayno Benjamin, Robert Ebersohn, Philip Snyman, Rocco Jansen, Johan Goosen, Pieter van Zyl, Davon Raubenheimer, Ashley Johnson, Heinrich Brüssow, Izak van der Westhuizen, Andries Ferreira, WP Nel, Adriaan Strauss (k), Trevor Nyakane.
Vir die jongste sportnuus volg Nuus24Sport op Twitter.
– Sport24
