Hawies sê oor keuses; Lappies uit
2012-02-23 09:59
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Bloemfontein. – Hulle wou seker maak die jong losskakel Johan Goosen word deur ervaring omring in die Cheetahs se eerste Super-rugbywedstryd van 2012.
Daarom is die skrumskakel Tewis de Bruyn en die Springbok-binnesenter Andries Strauss ten koste van die opwindende Pieter van Zyl en sterk Philip Snyman vir Saterdag se wedstryd teen die Lions in Johannesburg ingesluit.
“Sou ons Pieter en Philip in die beginspan kies, sou ons 9, 10 en 12 nog nooit Super-rugby in hul posisies gespeel het nie,” sê Hawies Fourie, agterlynafrigter van die Cheetahs.
Van Zyl en Goosen sal hul buiging in Super-rugby maak, terwyl Snyman al voorheen slegs as ’n vleuel op dié vlak gespeel het.
“Die seisoen is nog lank en almal sal genoeg speelkans kry, hetsy in die beginspan of van die bank af. Pieter behoort reeds teen die Lions genoeg kans te kry,” het Fourie gesê.
Fourie erken hy en die res van die Cheetahs-afrigtingspan het lank hieroor gesels voordat ’n finale besluit geneem is aangesien daar min tussen bogenoemde spelers te kies is.
Selfs op heelagter het ervaring die deurslag gegee toe daar oor Hennie Daniller en Willie le Roux besluit is.
Le Roux het baie beïndruk in die Cheetahs se losmakers en kan saam met Van Zyl groot impak as plaasvervangers teen die Lions maak.
De Bruyn, Strauss en Daniller het egter deur die jare al genoeg bewys dat hulle op dié vlak hoort.
Hulle sal teen die Lions gerat wees om die kans aan te gryp om dié seisoen gereeld in die beginspan uit te draf.
De Bruyn en Strauss se verdediging sal Saterdag deurslaggewend wees, terwyl Daniller as ’n sterk baldraer momentum op die aanval moet verskaf.
Die flank Lappies Labuschagné het hom intussen weens ’n skouerbesering aan die Cheetahs-beginspan onttrek.
Hy het sy skouer in Maandagaand se Varsitybeker-wedstryd in Stellenbosch tussen die Shimlas en Maties beseer en sal minstens die eerste twee Super-wedstryde misloop.
Labuschagné word deur Philip van der Walt in die beginspan vervang.
Die Springbok Ashley Johnson is steeds een van die die plaasvervangers.
Vir die jongste sportnuus volg Nuus24Sport op Twitter.
– Sport24