Hargreaves na Sharks ontbied
2010-03-10 09:18
In-diepte Verslae
Die afrigter van die Sharks, John Plumtree, het sy span aangekondig vir die vriendskaplike wedstryd teen Boland op Kingspark in Durban.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad – Alistair Hargreaves is Dinsdag na Australië ontbied om, indien nodig, die Springbok-slot van die Sharks Johann Muller in Saterdag se Super14-rugbystryd teen die Brumbies te vervang.
Muller het in die Durbaniete se openingswedstryd teen die Chiefs ’n hou teen die kop gekry en sedertdien sukkel hy met ’n vasgeknypte senuwee.
Hargreaves het in die daaropvolgende week teen die Cheetahs uitgedraf, maar is daarna om fiksheidsredes tuis gelos toe die span na Nieu-Seeland vertrek het.
Die Sharks se breier, John Plumtree, het egter meer as net Muller se skete om hom oor te bekommer voordat sy span teen die Brumbies uitdraf.
Odwa Ndungane (vleuel; dyspier) en Keegan Daniel (flank; hou teen kop) sal straks nie vir hierdie wedstryd beskikbaar wees nie.
Maar ondanks vier opeenvolgende nederlae is die span nog nie in sak en as nie.
Die Sharks ag hulself baie ongelukkig nadat hulle die afgelope naweek met 21-25 teen die Waratahs vasgeval het.
Hieroor het Plumtree op die Sharks se webwerf geskryf: “Daar was groot besluite wat teen ons gegaan het en wat ons helaas die wedstryd gekos het.
“Almal praat sedertdien oor Stefan (Terblanche) se aangee na Ryan (Kankowski) wat deur die siniese Kurtley Beale afgeklap is. Dit sou ’n seker drie gewees het.
“En daar was ’n aangee na Bismarck du Plessis wat as vorentoe beoordeel is, maar wat by nadere ondersoek as wettig bewys is en ook tot ’n drie sou gelei het.”
Maar, het hy bygevoeg: “Daar is tekens dat ons wel ons spel lig, hoewel ons uitvoering nog nie so akkuraat is as wat ons dit verkies nie.
“Ons het nodig dat al ons basiese fasette terselfdertyd reg werk. Want in dié stadium doen ons een ding reg, maar ons jaag weer in ’n volgende faset aan.”
Plumtree het daarop gewys dat daar oomblikke in die Waratahs-wedstryd was waarin alles reg verloop het, en dat die nuwe reëltoepassing by doodvatte ’n span toelaat om goeie fasespel op te dis.
Die Sharks se dissipline laat hom egter erg frons. “Dit pla my nou al ’n geruime tyd, en ek het vir die spelers ná die wedstryd gesê die volgende een wat ’n geelkaart kry, kry ’n rooie by my.
“Maar ek is regtig positief oor die span se karakter. Dit verg baie om van ’n 14-25 agterstand terug te veg soos wat ons Saterdag gedoen het. Ons sal bly voortveg,” het die Nieu-Seelander beloof.
- Beeld