Hare kan in Kaap waai
2011-04-25 09:33
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Durban – Dit klink asof die Stormers Saterdag ’n paar harde bielies in hul spore sal moet stuit as hulle bo-aan die Suid-Afrikaanse groep in die Super Rugby-reeks wil bly.
Nie net klink die Sharks versigtig optimisties dat Bismarck du Plessis slaggereed sal wees om teen die Kapenaars te speel nie, maar die stormram-flank Jean Deysel kan ook tot die span terugkeer.
Daarbenewens het John Smit ’n netjiese vertoning as Sharks-haker teen die Hurricanes gelewer.
Netjies genoeg dat hy die meeste spanne sonder twyfel sou haal, maar die jonger Du Plessis is ’n voetbalfrats en die Sharks is derhalwe nie die meeste spanne nie.
Tendai (Beast) Mtawarira en Willem Alberts het ook Saterdag skerp gelyk teen die Hurricanes – wat dit ’n liplek-wedstryd op Nuweland kan maak vir dié van ons wat ’n paar stampe in ons rugby waardeer.
John Plumtree, die Sharks-afrigter, het net geglimlag op die vraag of hy Deysel sal oorweeg en gesê: “As hy fiks is.”
Deysel het die afgelope drie wedstryde Vodacombeker-rugby gespeel, dus is die afleiding maklik om te maak.
Die Sharks-breier staal hom vir ’n moeilike sending.
“Ek sien nie veel vir ons daarin dat hulle hierdie naweek ’n loslootjie gehad het nie. Dit gaan nie help om hulle vir 40 minute te tref nie, dis baie moeiliker as dit.
“Daar is oorgenoeg op die spel – albei spanne sal agterna presies weet waar hulle staan,” het hy ná die wedstryd teen die Hurricanes gesê.
Volgens hom is sy span nie in die versoeking om ’n blaadjie by die Reds af te kyk nie.
Die Queenslanders is al span wat die Stormers nog vanjaar kon troef en het dit grotendeels met taktiese skopwerk gedoen.
“Die Reds se resep sal nie vir ons werk nie. Ons sal bly by wat ons pas. Jy kan ook nie te veel in een wedstryd probeer lees nie.”
’n Aspek van die Sharks se spel wat hul breier bekommer, is die lynstaanwerk.
Die Sharks het ’n stuk of drie ingooie verbrou, wat nie doodsake is nie, maar baie van hul lynstaanbesit was slordig en het hulle op die agtervoet geplaas.
“Ons het ’n paar opsies probeer, maar dit het nie goed gegaan nie.
“Ons lynstaanwerk is tans nie akkuraat genoeg nie en as ons dit nie gou uitstryk nie, sal die Stormers ons dáár onder lelike druk plaas.”
– Sport24
Bly op hoogte van al die jongste sportnuus deur Nuus24Sport op Twitter te volg