Hak hou Juan Smith uit vir hele jaar
2012-04-04 08:58
In-diepte Verslae
Die Waikato Chiefs het drie drieë teenoor die Crusaders se een gedruk om in die Super-kragmeting in Hamilton te seëvier.
Die Cheetahs se afrigter, Naka Drotské, het die versoeking weerstaan om Heinrich Brüssow in die 15-tal te kies vir die stryd teen die Higlanders.
Pietermaritzburg – ’n Yslike terugslag het Heyneke Meyer se beplanning vir 2012 getref nog voordat hy die eerste keer amptelik die Springbok-hoofafrigter in ’n rugbytoets was.
Die stil sluipskutter van Suid-Afrikaanse rugby, Juan Smith, het Dinsdag in ’n eksklusiewe onderhoud met Sport24 gesê dat hy besluit het om weens ’n hakseningbesering vir ’n onbepaalde tydperk ’n ruskans uit rugby te neem.
Suid-Afrika se voorste nr. 7-flank sedert 2003 het bevestig dat hy beslis nie vanjaar vir die Cheetahs of die Springbokke sal uitdraf nie.
Die 30-jarige Smith het sy haksening op 25 Februarie 2011 in ’n Super-wedstryd teen die Bulls in Bloemfontein beseer – hy het sedertdien verlede jaar se Wêreldbeker-toernooi misgeloop én was nog nie in vanjaar se Super-reeks in aksie nie.
Hy was Dinsdag uiteraard uiters teleurgesteld dat sy besering hom so lank van die veld hou en ná vier operasies nie so spoedig herstel het soos hy aanvanklik gehoop het nie.
“Die regte ding om nou te doen, is om my besering genoegsame tyd te gun om 100% te herstel, ” het Smith gesê.
Naka Drotské, afrigter van die Cheetahs, is platgeslaan oor die jongste nuus oor Smith se besering.
“Juan is die beste nr. 7-flank in wêreldrugby. Hy was die laaste klompie jare ook ons kaptein en om hom te verloor, is ’n reuse-terugslag,” het Drotské gesê.
“Dit gaan bitter moeilik wees om ’n speler van wêreldgehalte soos hy te vervang.”
Smith se hoop is nou daarop gevestig om in 2013 sterker as voorheen terug te keer en hy is bekend as ’n speler wat nie maklik handdoek ingooi nie.
Hy het hom juis net op die nippertjie aan 2011 se Wêreldbeker-toernooi onttrek toe hy nie langer die pyn kon verduur het waarmee hy geoefen het nie. As ’n ware spanmaat wat nie tydens dié toernooi als kon gee nie, het hy besluit om sake eerder vanaf die kantlyn dop te hou.
Nadat hy die Cheetahs se onlangse toer na Australasië misgeloop het, het Smith aanvanklik gehoop om sy terugkeer die naweek teen die Lions in die Rosestad te maak.
Meyer se eerste toets as Bok-hoofafrigter is op 9 Junie in Durban teen Engeland. Hoewel Suid-Afrika uitstekende losvoorspelers het, het Smith nie sy gelyke as baldraer, lynstaanman en leier in die span nie.
Die afwesigheid van sy ervaring sal Meyer se taak beslis bemoeilik teen ’n Engelse span wat die afgelope tyd ’n opwaartse kurwe toon.
Sy besering kan Meyer selfs dwing om ervare spelers soos Fourie du Preez, Jaque Fourie en Bakkies Botha vir die drie toetse teen Engeland te ontbied.
Vir die jongste sportnuus volg Nuus24Sport op Twitter.
– Sport24
