Groot pluimpie vir Juan
2010-05-02 22:02
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Bloemfontein - Die Springbok-flank Juan Smith is die spil waarom die Cheetahs se spel draai en moontlik die beste speler in sy posisie in wêreldrugby.
Só sê Naka Drotské, breier van die Cheetahs, ná nog ’n uitstekende vertoning deur Smith in sy span se Super14-sege van 36-32 eergister hier oor die Blues.
Smith, kaptein van die Cheetahs, gee wéér ’n nuwe betekenis daaraan om met voorbeeld te lei en is besig om kritici wat meen sy beste is verby se monde stil te speel.
Peter de Villiers, Bok-breier, sal breed glimlag oor Smith se spelpeil aangesien dié flank nie net vanjaar nie, maar ook in 2011 se Wêreldbeker-toernooi in Nieu-Seeland baie kan beteken.
Volgens Drotské was Smith se rol teen die Blues deurslaggewend.
“Juan is beslis in ’n klas van sy eie – almal weet dit. Hy is waarskynlik die beste nommersewe-flank ter wêreld en dis lekker om hom terug te hê.
“Ons het hom rêrig gemis in die drie of vier wedstryde waarin hy nie kon speel nie,” sê hy.
Smith se enorme bydrae tot die Cheetahs se verbeterde vertonings in die Super14 was reeds ’n week gelede in hul laaste toerwedstryd – teen die Chiefs – sigbaar.
Dié Bok het byna op eie houtjie ’n ommekeer aan die Cheetahs se treurmare in Australasië gemaak toe hy hulle tot ’n gelykop-uitslag van 25-25 teen die Chiefs aangevoer het.
Dié stryd was sy enigste wedstryd op toer omdat hy die ander weens die siekte en dood van sy pa misgeloop het.
Smith het teen die Blues aangegaan waar hy ’n week tevore opgehou het én sommer in die derde minuut gaan druk.
Hy het al met sy eerste stormlopie die gevaarligte laat afgaan toe hy die verdediging gebreek en die bal langs die een paal geplant het.
Die 28-jarige Smith het soos altyd gelak, gedryf, gestamp én gehardloop, maar boonop ook geskop.
Smith het in die 22ste minuut moeiteloos sy span se tweede drie vir die vleuel Jongi Nokwe met ’n netjiese steekskoppie bewerkstellig.
Behalwe dat sy teenwoordigheid wondere vir sy spanmaats se selfvertroue doen, speel Smith weer, soos tydens die Wêreldbeker-toernooi in 2007, van die beste rugby van sy loopbaan.
Die Cheetahs het groot loesings in hul eerste drie toerwedstryde beleef, maar wie weet wat sou gebeur het as Smith daar was om sake roer.