Groot mylpaal wink vir Fourie du Preez
2011-02-16 07:01
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria - Hy word die naweek die eerste Suid-Afrikaanse agterspeler wat in 100 Super-wedstryde speel wanneer hy vir die Bulls teen die Lions in Johannesburg uitdraf.
Maar dié mylpaal sal slegs vir Fourie du Preez iets werd wees as sy rugbyspan dié openingswedstryd van die 2011-seisoen wen.
Volgens dié hoogaangeskrewe Springbok-skrumskakel, wat ook 55 toetse agter die blad het, beteken dit baie om dié mylpaal vir die Bulls te bereik, maar “uiteindelik is dit net nog ’n wedstryd teen ’n gevaarlike teenstander. Dit is wel baie belangrik vir ons, want ons wil graag op ’n wennoot begin. Ek het ook lanklaas gespeel en is gretig om weer op die veld te verskyn.”
’n Skoueroperasie het hom byna agt maande van die veld af gehou.
Du Preez, wat in sy pa, Fourie (sr.) se voetspore gevolg het om vir die Blou Bulle te speel, is nie skaam om sy trots in die span en unie uit te stippel nie.
“Daarom is dit ’n geweldige voorreg en mylpaal. Ek was bevoorreg om só lank saam met sulke ouens van wêreldgehalte rondom my te kan speel en in strukture wat rugby so ’n plesier maak. Ek glo Super-rugby is die strafste reeks in wêreldrugby en om 100 wedstryde te speel, is ’n wonderlike gevoel.”
Hy het nie juis met Danie Rossouw en Victor Matfield, die ander twee Bulls wat al 100 wedstryde gespeel het, daaroor gesels nie. “Ek het darem al (meer as) 50 toetse gespeel, so ek weet dat dit ’n groot gebeurtenis is, maar dat jy steeds op die wedstryd moet fokus.”
Volgens Du Preez is hy gretig om sy beste te lewer. “Ek was lank uit en aanvaar dat dit ’n week of twee gaan duur voordat ek weer op my beste sal wees. Dit is my laaste seisoen vir die Bulls (hy gaan van November drie jaar klubrugby in Japan speel) so ek wil dit my beste seisoen maak. Maar mense moenie wonderwerke verwag nie.”
Hy het juis daarom by dieselfde voorbereiding gehou wat in die verlede gewerk het. “Hopelik bring dit dieselfde sukses.”
Du Preez glo die Lions gaan kwaai teenstand bied. “Ons het in 2005 daar teen hulle verloor, so ek weet hulle kan ’n haas uit die hoed pluk. Hulle is ’n gevaarlike span en beter toegerus as waar hulle verlede jaar dieselfde tyd was. Enige derby is ook mos maar ’n taai affêre.”
– Sport24
Bly op hoogte van al die jongste sportnuus deur Nuus24Sport op Twitter te volg