Goeie nuus vir Bulls se Kirchner
2011-02-08 09:33
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg - Die donderwolke het nie vreeslik lank oor Loftus Versfeld gehang nie voordat Zane Kirchner met ’n groot glimlag die silwer randjie vir die Bulls gewys het.
Dié Bok-heelagter, wat in die afgelope naweek sy ribbes teen die Pumas beseer het, het Maandag die goeie nuus aan sy spanmaats oorgedra dat dié besering hom nie, soos vooraf gevrees is, weke lank van die veld gaan hou nie.
Trouens, Kirchner kan selfs volgende week teen die Lions in die Bulls se openingswedstryd in die Super Rugby-reeks speel.
“Dit was toe nie so erg soos ons vermoed het nie,” het die Bulls se spandokter, Org Strauss, aan Sport24 bevestig.
“Zane het nie kraakbeen geskeur nie en afhangend van hoe vinnig hy op behandeling reageer, behoort hy nie langer as twee weke buite aksie te wees nie,” het Strauss gesê.
Dit beteken dat Kirchner, soos Francois Hougaard en Jaco Pretorius, in ’n wedloop teen tyd gewikkel is om op Coca-Colapark uit te draf.
Gelukkig vir die Bulls se afrigter, Frans Ludeke, is daar ’n rits keuses beskikbaar.
Die Bulls se sensasionele aanwins Bjorn Basson kan heelagter speel en Gerhard van den Heever is ook tuis in die laaste vesting.
Die beste keuse is om die veteraan Jaco van der Westhuyzen as heelagter te kies.
Hy het die afgelope naweek vir Kirchner kort ná die begin van die tweede helfte vervang en flink vertoon.
Ludeke moes verlede jaar wal gooi oor sy besluit om Van der Westhuyzen op vleuel in te span, maar min sal met hom verskil as hy dié 33-jarige oud-Bok op heelagter kies.
Van der Westhuyzen is topfiks en hoewel hy dalk ’n tree of wat van sy vaart ingeboet het, het hy steeds al die vaardighede om heelagter te speel.
Die Bulls oefen vanoggend die laaste keer vandeesweek, waarna die span eers weer Maandag bymekaar kom.
Dit is in teenstelling met ander Super-spanne soos die Lions, wat môre nog teen Tucuman en in die naweek teen die Kings speel.
Die Lions het in November verlede jaar net enkele spelers in die Bok-toerspan na Ierland, Wallis, Skotland en Engeland gehad, terwyl die Bulls ’n dosyn Springbokke in 2010 gehad het.
Dit is opvallend hoe die twee spanne se voorbereiding verskil. Ludeke is nie ’n voorstander van baie opwarmwedstryde nie. “Die bestuur van die spelers is een van die belangrikste aspekte in die Superreeks en vanjaar is die seisoen nog langer. Dit is dus baie belangrik om seker te maak die spelers kry ruskans wanneer die geleentheid hom voordoen. Dit help hulle nie net fisiek nie, maar ook psigies om ’n slag af te skakel.”
Ludeke het dus geen probleem om sy spelers huis toe te stuur nie. “Ek weet dat die spelers wat Maandag hier aankom, aangeskakel en gefokus sal wees vir die taak wat voorlê.”
Dié taak sal wees om die Lions se tjank af te trap en die seisoen op ’n wennoot te begin.
Bly op hoogte van al die jongste sportnuus deur Nuus24Sport op Twitter te volg.
- Sport24