G'n plek vir John Smit in dié voorry
2011-04-01 09:24
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Durban - Die Sharks begin Saterdag se Super Rugby-wedstryd teen die Stormers op Kingspark in Durban met sy sterkste voorry.
Dit beteken daar is geen plek vir die Springbok-kaptein, John Smit, nie.
Tendai (Beast) Mtawarira is as loskopstut in sy plek ingesluit, met Smit wat op die plaasvervangersbank sit.
Die span is eers Donderdagmiddag laat aangekondig omdat ’n griep-epidemie die Sharks-kamp getref het. Minstens vyf spelers het nog griep aan die vooraand van die wedstryd teen die Stormers.
In die enigste ander verandering speel JP Pietersen linkervleuel in die plek van nog ’n Springbok, Lwazi Mvovo.
Die twyfel vroeër die week oor die fiksheid van die losskakel Jacques-Louis Potgieter is by Donderdagmiddag se oefening uit die weg geruim.
Sy beseerde kuit het voldoende herstel dat hy wel kan speel. Hy het sonder enige ongerief aan die oefening deelgeneem en sal rigting aan die Sharks se aanvalle kan gee.
Dit is veral insiggewend dat die Sharks se afrigter, John Plumtree, besluit het om van Smit ontslae te raak in die voorry.
Teen die stewige skrumwerk van die Stormers is daar geen twyfel dat die Sharks hul grofgeskut moet inspan nie, en daarom is op die broers Du Plessis, Jannie en Bismarck, asook Mtawarira besluit.
Dit is juis een afdeling van die spel waarin Plumtree ’n aansienlike verbetering van verlede week teen die Crusaders op Twickenham in Londen verwag.
Met Smit as loskopstut het dinge glad nie goed gegaan nie en was die Sharks deurentyd in trurat.
Teen die Stormers kan dit nie weer bekostig word nie en daar sal kwaai druk op die Sharks se agttal wees om hul man te staan.
Die Sharks spog egter met ’n goeie vertoningslys in wedstryde net nadat hulle van ’n oorsese toer in dié reeks teruggekom het.
Oor die afgelope 10 jaar het die Sharks agt van hul wedstryde met hul terugkeer na Durban gewen.
Die enigste twee kere dat hulle direk ná ’n toer nie met ’n oorwinning by die huis kon afskop nie, was albei teen die Bulls.
Sharks-span:
Louis Ludik, Odwa Ndungane, Stefan Terblanche, Meyer Bosman, JP Pietersen, Jacques-Louis Potgieter, Charl McLeod, Ryan Kankowski, Willem Alberts, Keegan Daniel, Alistair Hargreaves, Steven Sykes, Jannie du Plessis, Bismarck du Plessis, Beast Mtawarira.
Plaasvervangers: John Smit, Eugene van Staden, Gerhard Mostert, Jacques Botes, Conrad Hoffmann, Adrian Jacobs, Lwazi Mvovo.
Vir die jongste sportnuus volg Nuus24Sport op Twitter.
- Sport24