G’n einde aan Lions-treurmare
2010-05-10 09:07
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg - Twee laaste rekords kan Saterdag ook Lions-besit word as hulle in Welkom ook die knie voor die Cheetahs buig.
Nadat die Lions Saterdag op Coca-Colapark skandelik deur die sukkelende Blues met 56-14 opgedons is, het hulle reeds Super-rugby geskiedenis om die verkeerde redes gemaak.
As hulle op ’n soortgelyke wyse teen die Cheetahs vasval, gaan die ongewenste rekords toeneem, want die Cheetahs lyk ná hul seges oor die Blues en die Western Force nou na ’n span om mee rekening te hou.
Dan sal die Lions 13 wedstryde vanjaar verloor het en hul voorganger, die Cats, se vertoningslys van 13 agtereenvolgende nederlae in Super-rugby tussen 2003 en 2004 ewenaar.
En waar dit gelyk het of die Lions darem die rekord van die meeste drieë nóg teen ’n span in ’n Superrugby-toernooi kan vryspring, kan dié een nou ook in skerwe lê.
Die 69 drieë teen die Chiefs in 2002 is die voorloper, maar aangesien die Blues Saterdag sewe keer teen die Lions gedruk het, staan die Johannesburgers nou op 63.
Ses Cheetah-drieë? Wel as die Lions soos in die afgelope paar weke speel, kan hulle enige kans op iets beter op hul maag skryf.
Ná die Blues-wedstryd het die Lions die span geword wat die meeste punte nóg in een reeks (532) afgestaan het. Hulle het ook nou die meeste agtereenvolgende wedstryde in ’n reeks (12) verloor.
Die Blues het op ’n drafstap gewen en gewys dat dié Lions-span nie sy sout in die reeks werd is nie. Twee Lions-drieë deur Carlos Spencer, waarin Tonderai Chavhanga (vleuel) en Cobus Grobbelaar (flank) sleutelrolle gespeel het, was al wat daar was om oor te juig.
Puntemakers:
Blues 56 (24): Drieë:Rene Ranger, Stephen Brett, Alby Mathewson, Paul Williams, Tom McCartney, Joe Rokococo (2). Doelskoppe: Brett (6). Strafdoel: Brett (3).
Lions 14 (14): Drieë: Carlos Spencer (2). Doelskoppe: Herkie Kruger (2).
- Die Burger