Gio 'gesny' en Stormers hou asem op
2011-02-11 06:56
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad – Die Stormers is op hete kole voor die aanvang van vanjaar se Super Rugby-reeks nadat die Springbok-vleuel Gio Aplon Donerdag ’n artroskopie aan sy regterknie ondergaan het.
Allister Coetzee, afrigter van die Kaapse streekspan, het die prosedure by navraag aan Sport24 bevestig.
Hy het nog nie terugvoer van die betrokke medici ontvang nie, maar is wel vol vertroue dat Aplon vir die Stormers se eerste wedstryd in vanjaar se reeks teen die Lions beskikbaar sal wees.
Die Stormers het op die prosedure besluit nadat daar onlangs opnuut inflammasie in Aplon se knie was. Hy het verlede jaar ’n swaar werkslas by die Stormers, Westelike Provinsie én die Springbokke gehad.
“Gio het nie vir ’n operasie gegaan nie. Dit was net om te kyk wat fout is met die knie,” het Coetzee gesê.
“Ons wil net seker maak. Ek wil nie hê sy knie moet in die middel van die reeks ingee nie. Hy is beskikbaar vir ons eerste wedstryd.”
Volgens Coetzee beteken die aard van die prosedure dat ’n speler gewoonlik vir twee tot vier weke op die krukkelys is.
Die Stormers het volgende week ’n loslootjie en speel op 26 Februarie teen die Lions.
Sou Aplon nie beskikbaar wees nie, kan Coetzee besluit om een van Jean de Villiers, Danie Poolman of JJ Engelbrecht op die vleuel in te span. Poolman en Engelbrecht is môre in die vriendskaplike wedstryd teen die Boland op Nuweland in aksie.
Engelbrecht het verlede jaar al vir die WP in die Curriebeker-reeks gespeel, terwyl Poolman drieë vir die Streeptruie se o.21-span ingeryg het.
Die onsekerheid oor Aplon vergroot ook die druk op Bryan Habana om sy spelpeil op te skerp. Nuweland het Saterdag vir die Internasionale Rugbyraad se speler van die jaar in 2007 gebrom toe hy ’n aangee misgevang het.
Coetzee het egter vandeesweek vir Habana in die bres getree.
“Ek kyk nie emosioneel na die saak nie. Ek sal graag vir mense sy betrokkenheid en werkverrigting wil wys, nie net die flambojante oomblikke waar hy drieë gaan druk nie,” het Coetzee gesê.
“Dit gebeur maar nou en dan dat ’n speler ’n bal aanslaan. Almal begaan foute.
“Jy kry egter nie sommer iemand wat so goed vir die bal in die lug meeding, verdedig en oral betrokke raak nie.”
– Sport24
Bly op hoogte van al die jongste sportnuus deur Nuus24Sport op Twitter te volg