‘Gebruik Soweto se enorme nasiebou-effek’
2010-05-27 08:00
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - Die feit dat ’n Super14-eindstryd in Soweto gespeel word, wys hoe ver Suid-Afrika gevorder het en die Stormers is verheug dat hulle deel van dié geleentheid kan wees.
Só sê die afrigter van die Stormers, Allister Coetzee, wat van 1989 tot 1991 die kaptein van die nie-rassige Suid-Afrikaanse Rugbyunie (Saru) se nasionale span was.
“Dis vir ons wonderlik om deel van geskiedenis te wees en in Soweto te gaan speel,” het Coetzee gesê.
“Wanneer is Super14- of Curriebeker-rugby (voor verlede week) al ooit daar gespeel, veral as jy in ag neem wat die persepsies van die sport in sekere dele van die land is?
“Die persepsie is dat die gemeenskap van Soweto sokker wil sien en rugby oorwegend wit is.
“Dit wys net hoe ver die land al vorentoe beweeg het, en dis vir die Stormers wonderlik om deel van die ontwikkeling van die spel te wees.”
Intussen het prof. Willie Basson, wat Saru as strategiese konsultant met transformasie bystaan, gesê die sportkode moet die geleenthede wat groot rugby in Soweto geskep het “met albei hande” aangryp.
“As dié kans benut word, kan die vloei van swart rugby-ondersteuners na tradisionele wit stadions op dreef kom.
“Sewentig persent van ondersteuners wat rugby op TV kyk, is swart en 30% wit. Dit wys dat daar (by almal) ’n ingebore nuuskierigheid oor rugby is.”
Basson hoop rugbybeamptes in die noorde buit die situasie uit en maak hul stadions toeganklik vir swart rugbyliefhebbers.
“Jy kan jou voorstel wat kan gebeur nou dat ’n tweede wedstryd in Soweto aangebied word,” het Basson gesê.
“Die Bulls se ondersteuners sou verras gewees het met wat hulle in Soweto aangetref het en hoe toeganklik dit was.
“Die vraag is nou of Loftus en Coca-Colapark toegankliker gemaak gaan word. Wat is die taktiek? Hierdie yster moet gesmee word terwyl hy warm is.
“Die ys is nou gebreek. Wit mense het veilig in Soweto gevoel en daar is lank laas so gekuier...."
“Die nasiebou-effek is enorm.”
Basson hoop Soweto se gasvryheid word “wedersyds terugbetaal.” Volgens hom moet rugbybeamptes proaktief optree.
“Daar kan met die gemeenskappe in Soweto en Bulle se ondersteunersklub saamgewerk word,” het hy verduidelik.
“Dis ’n geleentheid wat op ’n onverwagse manier gekom het en benut moet word.”
Volgens Basson is 48% van jong spelers van o.11- tot o.21-vlak swart.
“Dit wys jou die proses vind plaas. Ons sien dit om sosiale redes nog nie op ’n hoë vlak nie,” het hy bygevoeg.
Bly op hoogte van al die jongste sportnuus deur Nuus24Sport op Twitter te volg.
- Sport24