Francois oor maand weer reg
2010-06-01 08:03
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
J.J.Harmse
Pretoria - Francois Hougaard sal oor ’n maand weer kan rugby speel. Dié Bulls-held het gister ’n operasie aan sy hand ondergaan nadat hy in die eindstryd van die Super14-reeks met ’n gebreekte hand gespeel het.
Volgens die Blou Bulle se spandokter, Org Strauss, het die operasie goed afgeloop en behoort Hougaard fiks te wees as die span sy Curriebeker-veldtog op 9 Julie teen die Pumas afskop.
Hougaard het ’n goeie kans om deel te wees van die Drienasies-groep, maar hy sal waarskynlik nou die oorsese deel daarvan misloop, aangesien die Springbokke reeds op 4 Julie Nieu-Seeland toe vertrek. Hy sal nietemin ’n waardevolle speler vir die Blou Bulle wees.
Dié span sal teen daardie tyd ook op verskeie ander ervare spelers kan begin staatmaak.
Bakkies Botha sal reg wees nadat kraakbeen uit sy knie verwyder is en Gerhard van den Heever, wat sy dyspier in die eindstryd beseer het, sal oorweeg kan word.
Dit is nog onseker of Botha eers ’n wedstryd in die Curriebeker-reeks gaan speel en of hy dadelik in die toetse teen Italië kans gegee sal word om sy slag te wys.
John Mametsa, wat ’n bobeenspier geskeur het, kan oor drie weke begin saamdraf.
Die uiters belowende Frik Kirsten, wat verlede jaar ’n nekoperasie ondergaan het, het reeds ’n hele paar wedstryde vir sy koshuis gespeel en sal vir die Curriebeker-veldtog oorweeg kan word.
Bly op hoogte van al die jongste sportnuus deur Nuus24Sport op Twitter te volg.
- Sport24