Ervare Ross op stut vir Boland
2012-02-09 09:59
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad – Die Boland-Kavaliers het ’n ervare stut-aanwins in Ross Geldenhuys bygekry vir Vrydagaand se vriendskaplike wedstryd teen die Sharks in Durban.
Geldenhuys het al 19 Superrugby-wedstryde vir die Lions gespeel en het voorheen ook vir die Grens en Pumas uitgedraf.
Hy was vroeg in sy loopbaan ook in die Westelike Provinsie se strukture, maar nie een van sy 72 eersterangse wedstryde was vir die Streeptruie nie.
“Ons leen Ross by die Leeus. Daar is nog nie ’n kontrak met hom gesluit nie, maar ons sal onderhandel as hy tevrede is hier by ons,” het die Kavaliers se afrigter, Eugene Eloff, gesê.
Die 29-jarige Geldenhuys verskaf waardevolle ervaring aan die Kavaliers se voorry nadat Eugene Butterworth en Janro van Niekerk albei Griekwas toe is.
Eloff het in ’n verrassende skuif vir Jacquin Jansen as buitesenter gekies. Jansen is ’n heelagter, maar Jonathan Francke bevind hom vandeesweek in die laaste vesting.
“Ek sien uit daarna om te sien wat daardie kombinasie teen ’n Super-span sal kan doen,” het Eloff gesê.
“Jacquin is blitsvinnig en kan sy pad deur ’n halwe gaping vind. Ek het gevoel hy is te ver van die spel af op heelagter.”
Die Kavaliers sal nie ’n kans staan teen ’n Sharks-span op volle sterkte nie, maar Eloff streef ander doelwitte na.
“Ek wil sien of ons strukture werk en hoe die spelers se besluitneming onder druk is. Hulle het reeds teen die Stormers baie karakter getoon.
“Dis ook belangrik om te sien hoe ons met besit deur fases geleenthede benut.
“Ek wil nie hê die span moet uitsluitlik van omgekeerde besit af speel nie.”
Eloff moet steeds oor die weg kom sonder die ervare Bolla Conradie en die haker Clemen Lewis. Albei is by die Stormers.
Die losskakel Elgar Watts en losvoorspeler Zandré Jordaan behoort teen Maart van hul skouerbeserings te herstel.
Die Boland-span is:
Jonathan Francke, Senan van der Merwe, Jacquin Jansen, Siviwe Magaba, Brendon April, Ricardo Croy, Neil Papier, Junior Bester, Thor Halvorsen, Franzel September (k), Nolan Clark, Jerry Sefoko, Ross Geldenhuys, Chris Buckle, Charl du Plessis.
PLAASVERVANGERS: Martin Nel, BJ Julies, Jaco du Toit, PJ van Zyl, Juwell Samuels, Jeremy Plaatjies, Cola Wiliams.
Vir die jongste sportnuus volg Nuus24Sport op Twitter.
– Sport24