Elton kry sy tweede 'lewe' by Mitchell
2011-05-13 07:07
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg – Elton Jantjies kry Saterdag sy tweede “lewe” in dieselfde Super Rugbyreeks wanneer hy as die Lions se losskakel in Canberra teen die Brumbies uitdraf.
Dié jong Springbok is ná sy vinnige opgang in 2010 vanjaar met ’n knal terug aarde toe gebring toe hy gesukkel het om in die ongenadige Superreeks te oorleef.
Sedert die Lions-afrigter, John Mitchell, Jantjies gepos het, is André Pretorius en Burton Francis ingespan.
Pretorius is gou weer beseer, maar Francis het ’n mate van bestendigheid gebring, iets waarna die Lions gesoek het.
Tog is Jantjies vandeesweek terug in die nr. 10-trui.
“Ek het rede gehad om Elton vir ’n ruk weg te laat, maar dit het hom nederig gehou,” het Mitchell gesê.
“Ek dink hy kan hom nou beter vir ’n groot wedstryd voorberei.
“Boonop wil ons die verdedigingslinie veel meer aanval en Elton kan dit doen,” het hy die jongste verandering op losskakel verduidelik.
“Burton het ons in goeie posisies op die veld gekry en met die stelskoppe geslaag, maar hy val nie die lyn genoeg aan nie.
“Dus is Elton weer terug en ons sal nou sien of hy uit sy vorige ervarings geleer het.
“Hy het duidelik al die talent wat ’n mens wil hê.”
Om Jantjies nou in Australië los te laat, is waarskynlik beter as om dit tans op Coca- Colapark in Johannesburg te doen.
Woedende Lions-ondersteuners het vanjaar, toe Jantjies en die span in die reeks begin sukkel het, hul toorn op die 20-jarige losskakel gemik en hom begin uitjou.
Tog het Mitchell groot vertroue in Jantjies en die afrigter glo sy nuutste Springbok gaan gou weer die toeskouers aan sy kant hê.
Met Butch James wat volgende week teen die Waratahs in die beginspan kan wees, sal Jantjies môre sy kans met albei hande moet aangryp.
Jantjies en Jano Vermaak is môre die skakelpaar teen die Brumbies. Vermaak is etlike seisoene al een van die Lions se beste agterspelers, maar vanjaar het hy by tye gesukkel.
Hy en die nuwe aanwins Rory Kockott is om die beurt as die skrumskakel in die beginspan gebruik, maar nie een van hulle het juis sy stempel afgedruk nie.
– Sport24
Bly op hoogte van al die jongste sportnuus deur Nuus24Sport op Twitter te volg