Drieëkrag vs. plettervatters
2010-05-26 07:45
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad – Vergeet maar van sierlike hardlooprugby en maak reg vir ’n Super14-eindstryd wat Saterdag in die Orlando-stadion se loopgrawe in Soweto beslis gaan word.
“Dis ’n derbystryd en gaan nie skouspelagtig wees nie.
"Daar word nie vir bonuspunte gespeel nie.
"Dit gaan ’n klipharde stryd in die loopgrawe wees,” sê die Stormers se afrigter, Allister Coetzee, oor die kragmeting met die Bulls.
Op die oog af is dit ’n stryd tussen die beste aanvallende en verdedigende spanne in die Super14-reeks.
Die Bulls en Blues het in die ligafase van die reeks elk 47 drieë gedruk, maar sedertdien het die Pretorianers 3 in die halfeindstryd teen die Crusaders bygevoeg en hulle trek nou al by ’n indrukwekkende 50.
Hoewel die Stormers met Juan de Jongh se puik individuele poging teen die Waratahs bygetel net op 37 drieë trek, het hulle ’n skamele 17 afgestaan.
Die Crusaders, met 24 drieë afgestaan in die ligafase, was die naasbeste span op verdediging.
Coetzee glo die oorsprong van die Bulls se vele drieë lê in die akkurate uitvoering van hul deurwinterde wedstrydplan.
“Gaan kyk ’n bietjie hoe hulle in jou helfte kom.
"Dis selde dat hulle drieë van 60 meter af druk.
"Hulle kom in jou kwartgebied en val dán aan.
“Jy moet uitvind hoe hulle daar kom en die groot ding is dat jy die skopstryd moet kan hanteer.
"As jy nie kan nie, is jy dood.”
Die Bulls het ook besonder sterk baldraers soos hul Springbok-agtsteman, Pierre Spies, en binnesenter, Wynand Olivier.
Albei is bedrewe in die kuns om duikslae af te skud en oor die voordeellyn te kom.
“Ons weet hulle is ’n span wat op momentum floreer. As jy hulle toelaat om jou agter die voordeellyn vas te pen, gaan dit ’n lang dag wees,” sê Coetzee.
“Die Waratahs is ook ’n span met ’n groot pak en sterk hardlopers.
"Ons het hulle momentum gestuit en dit het gelyk of hulle geen ander plan gehad het nie.
“Hierdie naweek gaan ’n groot stryd by die voordeellyn woed.
"Ons moet net by ons verdedigingstelsel hou.
"Die Bulls is ook ’n span wat volgens bepaalde strukture speel en dis waarom hulle meer wedstryde wen as wat hulle verloor.
“Ons gaan fisiek en op die verdediging getoets word. Alles begin by die vaste fasette.
"Ek verwag ’n epiese stryd.”
Die verwagte tweestryd in die lynstane tussen Victor Matfield en Andries Bekker dui op hoe groot dit gaan wees.
As daar risiko’s geneem word, wil Coetzee hê dit moet berekend van aard wees en hy ontmoedig sy span ten sterkste om rugby in hul eie halfgebied te speel.
“Die Bulls val goed aan, maar dit beteken nie hulle neem risiko’s nie. Hulle val van die regte posisies aan,” sê hy.
“In ’n eindstryd is dit ’n geval van berekende risiko’s en die regte besluite neem.
“Die Crusaders het vroeg al die speelwerk teen die Bulls gedoen.
"Hulle het die bal probeer behou en die wedstryd na die Bulls geneem. Dis nie ’n slegte ding om te doen nie, maar dis dom as jy dit in jou eie halfgebied doen en die bal by die volgende losskrum verloor.
“Die drieë word van omkeerbesit gedruk. Dis ’n geval van berekende risiko’s. Goeie besluitneming is iets wat ek aan die span verkondig. Dis van kardinale belang.”
– Sport24
Bly op hoogte van al die jongste sportnuus deur Nuus24Sport op Twitter te volg.