Dis kwaai terugslag, sê Smit
2011-06-13 10:01
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg - “In plaas van die teerpad het ons nou besluit om die gruispad te volg om by die uitspeelstryde te kom,” het John Smit, die Sharks-kaptein, Saterdagaand hier gesê ná sy span se gelykop-uitslag van 30-30 teen die Lions.
Aan die een kant moes dit vir die Sharks gevoel het asof hulle uit Fort Knox ontsnap het deur in die laaste 20 minute ’n agterstand van 9-30 uit te wis, maar Smit kon steeds nie sy teleurstelling verberg nie.
“Dit is nie die uitslag wat ons wou hê nie. Ons het hierheen gekom om te wen en dit het nie gebeur nie.
Dit is ’n kwaai terugslag in ons strewe om die uitspeelstryde (in die Super Rugby-reeks) te haal.
“Nou moet ons dinge op die moeilike manier doen (om die Bulls Saterdag op Loftus Versfeld te klop).
Ons hou aan om die wêreld vir onsself moeilik te maak,” het Smit gesê oor sy span se futlose vertoning in die eerste helfte en ook in die eerste 10 minute van die tweede helfte toe die tuisspan met inklimspel die Sharks heeltemal oorskadu het om ’n groot voorsprong op te bou.
Die Sharks klou darem nog met hul vingerpunte aan die sesde plek op die puntelys.
Maar as die Western Force hulle nie Saterdag ’n guns bewys en die Waratahs klop nie, sal niks minder nie as ’n sege oor die Bulls in Pretoria goed genoeg wees om hulle in die uitspeelstryde te kry.
“Dit is iets wat ons wou vermy,” gee die Sharks-kaptein toe oor hul Sending Loftus.
Nie Smit, óf die Sharks-afrigter, John Plumtree, kon die boerpot-vraag beantwoord oor hoekom dit hulle aanhoudend meer as ’n helfte neem om aan die gang te kom nie.
’n Span kan net soveel keer die kastaiings uit die vuur krap – en teen die Bulls sal dit nie sommer gebeur nie.
“Ons kon nie momentum kry nie en het glad nie goed begin nie. Hul (die Lions se) fisieke spel het ons onkant betrap.
Ons wou veel meer in die middel van die veld dryf, maar kon dit nie regkry nie,” het Plumtree erken.
Die afwesigheid van die stewige losvoorspelers Jean Deysel en Willem Alberts was ’n gevoelige slag en met die ligter losvoorspelers Keegan Daniel en Jacques Botes kon die Sharks nie hul stempel afdruk nie.
Deysel sal ná sy skorsing terug wees teen die Bulls, maar daar is steeds onsekerheid of Alberts sal kan speel.
Jannie du Plessis en Odwa Ndungane moet ook fiksheidstoetse slaag voordat hulle oorweeg kan word.
Plumtree gee ook toe dat die geelkaart wat Butch James weens ’n gevaarlike duikslag op Daniel gekry het, ’n keerpunt was.
Smit glo die Sharks hét die spelers om sukses in die reeks te behaal, maar die Durbaniete sal kopkrap oor wat gedoen moet word om die Bulls in hul heiligdom te klop.
Ná die oortuigende wyse waarop die Bulls enkele weke gelede in Durban gewen het en die Sharks se sukkelvertonings teen die Waratahs, die Cheetahs en die Lions is dit onwaarskynlik dat die Sharks in Pretoria sal seëvier.
Vir die jongste sportnuus volg Nuus24Sport op Twitter.
- Sport24