Die oomblik van waarheid
2011-07-02 09:25
In-diepte Verslae
Joe Pietersen, die Stormers se heelagter, sal weens 'n besering nie teen die Sharks op Kingsmead in Durban uitdraf nie.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - As Francois Pienaar voor die Wêreldbeker-eindstryd in 1995 op die busrit na Ellispark Roger Whittaker se liedjie I Don’t Believe In If Anymore gebruik het om die Springbokke te motiveer, kan die Stormers se kaptein, Schalk Burger, hom seker vanmiddag op die Moody Blues beroep.
Dink net ’n bietjie hoe goed This Is the Moment die boodskap by sy spanmaats kan tuisbring, want ’n Super Rugby-halfeindstryd teen die Crusaders is inderdaad die groot oomblik.
Maar Burger sal dalk vir jou sê dat niks wat hy – of die Moody Blues – sê ’n verskil gaan maak nie. Die Stormers wil dié een op Nuweland uiters graag wen en die vraag is bloot hóé hulle die kitaar gaan slaan. Met al die Crusaders-voorspelers in die begin-agttal wat al die All Blacks verteenwoordig het, kan dit as ’n gegewe aanvaar word dat daar ’n groot fisieke aanslag deur die besoekers gaan wees. Veral in die voorry kan dit rof raak en om vir Owen Franks, Correy Flynn en Wyatt Crockett in die oë te kyk, is op sigself ’n reuse-uitdaging.
Die Crusaders-voorrymanne se baarde laat die hele spulletjie erg intimiderend lyk, maar die Stormers het verlede jaar in ’n ligawedstryd teen ’n pak met sewe van die agt wat vandag aantree, gewys dat fisieke oorheersing teen hulle nie ’n onbegonne taak is nie.
Net soos die Crusaders kan aanvoer dat hulle vroeër vanjaar met ’n verswakte span op Nuweland gewen het, kan die Stormers terugkyk na verlede jaar se sege van 42-14 op dieselfde veld en hulself wysmaak dat dit wéér gedoen kan word.
Sonny Bill Williams is wel vanjaar in die Crusaders se middelveld ingesluit, maar om hom as die verpersoonliking van die Stormers se uitdaging te sien is, is verkeerd.
Dít was vandeesweek die mening van die Stormers se agterlyn-afrigter, Robbie Fleck.
“Hy het in ons laaste wedstryd ’n aandeel in albei die Crusaders se drieë gehad en daar was ’n geweldige bohaai oor hom, maar hy is net een van 22 puik spelers.
“Dis eintlik spelers soos George Whitelock en Wyatt Crockett wat die Crusaders se onbesonge helde is,” het Fleck gesê.
“Die geheim van hul sukses lê opgesluit in die 20 doodvatte wat sekere spelers uitvoer sonder om een te verbrou.
“Hulle werk geweldig hard vir mekaar en dís wat kragtige hardlopers soos Sonny Bill, Sean Maitland en Robbie Fruean in staat stel om verwoesting te saai.”
Dit is dus belangrik vir die Stormers om dieselfde werkywer aan die dag te lê en dit selfs te oortref.
Dat die Kapenaars akkuraat in die uitvoering van hul wedstrydplan moet wees, is ’n gegewe, maar die groot vraag is of die Stormers werklik glo dat hulle teen ’n puik teenstander op Nuweland die wa deur die drif kan trek.
Dis insiggewend dat hul tuisnederlae vanjaar teen die Reds, die Crusaders en die Bulls was. Die Reds het eindelik bo-aan die algehele puntelys geëindig en die Crusaders derde.
Die Bulls het net-net nie die uitklopronde gehaal nie. Die puntelys toon dat die Stormers Suid-Afrika se toonaangewende span is en hulle moet dié vaandel met oorgawe dra en nie ’n oomblik twyfel nie. Tuisveldvoordeel maak die Stormers seker die gunsteling-span.
Hulle is boonop lekker uitgerus en die Crusaders moes nogmaals ’n lang vlug aanpak.
As daar ’n liedjie is wat teen hierdie tyd al op dié Kiwi’s van toepassing is, is dit I Believe I Can Fly.
Dié halfeindstryd behoort dus gelykop te verloop, met die Stormers seker met ’n kortkop die gunstelinge, gegewe die omstandighede.
Die Stormers se Springbok-senter Jaque Fourie is intussen fiks verklaar, maar die skrumskakel Dewaldt Duvenage se deelname was gister nog in die weegskaal. Die span het aangedui dat ’n finale besluit oor Duvenage eers vanoggend geneem sal word.
Die kans is dus goed dat Louis Schreuder die nr.9-trui moet dra. In só ’n geval sal nóg ’n onervare skrumskakel, Nic Groom, Schreuder se plek op die plaasvervangersbank neem.
– Bly op hoogte van al die jongste sportnuus deur Nuus24Sport op Twitter te volg.
- Die Burger