De Jongh het nooit getwyfel oor sy WP-lojaliteit
2012-03-14 09:45
In-diepte Verslae
Die Sharks sowel as die Springbokke het 'n terugslag beleef met die nuus dat die vleuel JP Pietersen lank op die krukkelys gaan wees.
Die Cheetahs se afrigter, Naka Drotské, het die versoeking weerstaan om Heinrich Brüssow in die 15-tal te kies vir die stryd teen die Higlanders.
Kaapstad – Die Westelike Provinsie is in sy bloed.
Dít is waarom daar vir die Springbok-senter Juan de Jongh geen debat was oor waar hy sy rugby tot einde 2015 sal speel nie.
“Ek het my vir nóg drie jaar tot die WP verbind. Dit was nie ’n moeilike besluit nie, want ek het al my senior rugby hier gespeel en is as ’n ondersteuner van die WP en Stormers grootgemaak,” het dié 23-jarige middelveld-ster Dinsdag gesê.
“Die gees wat ek die laaste paar jaar hier ervaar het, was ongelooflik. Ek het ook baie geleer.
“Daar is nou baie van die junior én senior spelers wat nuwe kontrakte gesluit het. Ons kan met daardie kern net sterker raak en hopelik trofeë wen.”
Die Stormers se afrigter, Allister Coetzee, het ook bevestig dat ’n nuwe kontrak met die vleuel Gio Aplon gesluit is. Aplon sal “langtermyn” by die WP wees.
Ma’a Nonu en Benson Stanley sal waarskynlik vir die Blues oorkant De Jongh en Jean de Villiers in Vrydagaand se Super-wedstryd op Nuweland speel.
“Nonu en Stanley is spelers met groot reputasies en baie ervare. Hopelik kan ons die beste van die saak maak,” het De Jongh gesê.
Die Stormers se agterlyn het nog nie vanjaar noemenswaardige hoogtes bereik nie, maar De Jongh meen hy en De Villiers kan die proses aanhelp.
“Dit neem tyd om kombinasies te vestig. As ons beter raak, sal dit die hele agterlyn vorentoe vat.”
Dat die Blues sonder hul geskorste All Black-vleuel Rene Ranger sal wees, is iets waarin De Jongh nie belangstel nie: “Rene is ’n goeie speler, maar ons fokus op onsself. Ongeag wie hulle bring, is ons agterlyn se fokus om ons spelpeil te lig.”
De Jongh was verlede jaar een van die uitblinkers, toe die Stormers ’n agterstand van 3-19 uitgewis het om die Blues met 28-26 op Edenpark in Auckland te klop.
“Ons het verlede jaar naelskraap teen die Blues gewen. Dit was heerlik om ’n goeie sege te kry, maar daar is vanjaar nuwe uitdagings. Ons wil voortbou op wat reeds bereik is,” het hy gesê.
Vir die jongste sportnuus volg Nuus24Sport op Twitter.
– Sport24
