Dalk einde van De Wet Barry se Bulls-droom
2010-02-08 23:34
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria – Die goeie vertoning deur Jacques-Louis Potgieter as binnesenter én ’n besluit om spelers binne die Bulls-strukture te ontwikkel, gaan waarskynlik die einde van De Wet Barry se Bulls-drome beteken. Barry is nie in dié span se finale groep vir vanjaar se Super14-reeks ingesluit nie, met Stefan Watermeyer wat volgens die pas-vrygestelde Super14-mediagids die regmerkie as vierde senter gekry het.
Wynand Olivier en Jaco Pretorius kies hulself as die Bulls se gereelde senterkombinasie en weens Potgieter se goeie spelpeil op binnesenter het die breier, Frans Ludeke, skynbaar op die jeugdige vermoë van Watermeyer, eerder as die gryse wysheid van Barry, besluit.
Die 20-jarige Watermeyer kan in byna elke posisie in die agterlyn speel, maar sal hoofsaaklik in die middelveld gebruik word.
Stephan Dippenaar, wat reeds in 2008 vir die Bulls uitgedraf het, sal die ander senter/vleuel in die groep wees wat heelwat veelsydige agterspelers insluit.
Morné Steyn kan in drie posisies speel. Olivier het in drie verskillende posisies toetsrugby gespeel en Pretorius in twee.
Met Potgieter wat ewe tuis is op losskakel, senter en heelagter en Francois Hougaard wat skrumskakel, senter en vleuel kan speel, is dit duidelik dat die Bulls ’n baie veelsydige groep agterspelers het. Potgieter, wat in sy o.16-jaar twee wedstryde vir Afrikaans Hoër Seunskool as stut gespeel het en later heelagter was, gee nie om waar hy speel nie. “Ek is ’n losskakel, maar is ook baie gemaklik op binnesenter. Tydens die oefenkamp het ek op nr. 10 en nr. 12 geoefen,” het die 26-jarige speler gesê.
Volgens hom is hy nie spyt dat hy weer terug is by die Bulls nie, al was hy by die Cheetahs van meer speelkans verseker. “Die Bulle is die wêreld se beste franchise en ek wil graag weer vir hulle speel. Ek het baie kans by die Cheetahs gekry en sal nooit spyt wees dat ek soontoe is nie,” het Potgieter gesê.
Die Bulls speel juis oor ’n week teen die Cheetahs in Bloemfontein en volgens Potgieter het sy nuwe span meer spelbrekers as hul teenstanders. “Die Cheetahs het twee of drie spelbrekers, maar die Bulls het nege,” het hy die verskil tussen die twee spanne op die Bulls se webwerf uitgelig.
Ligte beserings aan Pierre Spies en Hougaard kan dalk hul deelname verhinder.
– Die Burger