Crusaders se wens word waar
2010-05-21 07:33
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pieter Jordaan
Johannesburg – Oomblikke nadat die Crusaders twee weke gelede naelskraap teen die Bulls op Loftus Versfeld verloor het, het dié Nieu-Seelanders besluit hulle móét ’n herontmoeting met die reekskampioene kry.
Andy Ellis, die Crusaders se All Black-skrumskakel, het gister vertel hoe môre se Super14-halfeindstryd teen die Bulls in Soweto dus eintlik ’n antwoord op die Nieu-Seelandse rugbyspan se wens was.
“Ons het agterna (ná hul nederlaag van 35-40) gaan sit en gesê ons wil regtig weer hierheen kom om teen die Bulls te speel.
“En kan jy glo, hier sit ons nou twee weke later,” het Ellis by die spanoefening in Fourways gesê.
Dit is juis omdat die Crusaders daardie dag teen die Bulls bloed geruik het wat hulle oortuig dat ’n sege in die Orlando-stadion moontlik is.
Was dit nie vir Francois Hougaard (vleuel) se omstrede drie in die laaste beweging van die wedstryd nie, hét die Crusaders gewen.
“Maar dit is hoekom ons hierdie spel speel.
Jy wil voor vol pawiljoene speel wanneer alles op die spel is.
Dit is altyd spesiaal in Pretoria want die mense staan so bankvas agter die Bulls. ’n Kragmeting tussen hulle en ons is altyd iets besonders,” glo Ellis.
Die wedstryd in die Orlando-stadion beloof om weer ’n kragstryd soos min te wees, hoewel daar diegene is wat glo die Crusaders sal gans te vlugflou wees.
Ná die nederlaag op Loftus moes die Crusaders na Nieu-Seeland terugkeer vir verlede Vrydag se reg-of-weg-wedstryd teen die Brumbies, waarna hulle weer vandeesweek Suid-Afrika toe moes kom.
Ellis glo egter nie dié faktor sal sy span kniehalter nie.
“Om die waarheid te sê, is dit beter dat ons so onlangs nog hier (in Suid-Afrika) was.
“Die ouens is eintlik nog so ’n bietjie in Suid-Afrikaanse tyd vasgevang.”
Richie McCaw, die Crusaders se kaptein, het ook gesê dat die Hoëveld se dun lug iets is wat sy span al genoeg beleef het dat dit nie ’n probleem is nie.
“Ons is die afgelope twee weke eintlik twee keer om die wêreld, maar ons het die soort goed al genoeg gedoen dat ons Saterdag (môre) reg behoort te wees.”
Volgens Todd Blackadder, die Crusaders se afrigter, was die aanpassing by die tydsones eintlik ’n groter probleem vir die Crusaders met hul terugkeer na Nieu-Seeland en die wedstryd teen die Brumbies, as wat nou die geval is.
Ellis glo ook die afwesigheid van Bakkies Botha is goeie nuus vir die Crusaders en sal help dat hul droomstryd nie in ’n nagmerrie ontaard nie.
“Dit is waarskynlik beter vir ons, maar ons is steeds jammer dat hy nie speel nie want dit is lekker wanneer so ’n harde speler teen ons speel en goed in jou ore fluister op die veld,” het Ellis geskerts.
“Ek dink veral Brad Thorn (Crusaders-slot) is spyt hy speel nie teen Bakkies nie.”
Die Crusaders se beginspan wat gister gekies is, is dieselfde as die een wat die Brumbies Vrydag in Christchurch gelooi het.
Van Dan Carter (losskakel) en Ben Franks (stut) se enkelbeserings was daar geen teken by die spanoefening in Fourways nie, en hulle is ook ingesluit.
Daar is slegs een verandering onder die plaasvervangers, waar die skrumskakel Kahn Fotuali’i by Willi Heinz oorneem.
Die Crusaders-span is: Colin Slade, Sean Maitland, Robbie Fruean, Daniel Bowden, Zac Guildford, Dan Carter, Andy Ellis, Kieran Read, Richie McCaw (k), George Whitelock, Sam Whitelock, Brad Thorn, Ben Franks, Ti’i Paulo, Owen Franks.
PLAASVERVANGERS: Daniel Perrin, Wyatt Crockett, Chris Jack, Thomas Waldrom, Kahn Fotuali’i, Tim Bateman, Jared Payne.
Bly op hoogte van al die jongste sportnuus deur Nuus24Sport op Twitter te volg.
- Sport24