Crusaders lig wenkbroue oor Brits
2011-07-01 07:42
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad – Die Crusaders se afrigter, Todd Blackadder, het gister die etiek bevraagteken van die Stormers se besluit om Schalk Brits vir Saterdag se Super Rugby-halfeindstryd hier te betrek.
“Dis iets waaroor Sanzar moet besluit, maar dit kom daarop neer dat ’n wêreldgehalte-speler op ’n kritieke tydstip van die seisoen ingebring word,” het hy gesê.
“Ek wil nie te veel daaroor sê nie, want ek wil fokus op wat ons gaan doen. Tog glo ek Sanzar gaan daardie skuiwergat in die reëls aan die einde van die seisoen toemaak.
“Dis ’n besluit wat die Stormers geneem het en ons kan niks daaraan doen nie. Ons gaan net daarop fokus om ’n goeie vertoning te lewer. Duidelik het die Stormers toestemming gekry en was daar geen ander losvoorspelers in die Kaap oor nie.”
Die Stormers se besluit om Brits te betrek, het gekom nadat die Suid-Afrikaanse o.20-losvoorspeler Siya Kolisi verlede Vrydagaand aangerand is.
Sanzar het vroeër vandeesweek bevestig dat hy verslae oor beserings rakende Kolisi, Pieter Louw en Duane Vermeulen ontvang het.
Hoewel die beheerliggaam Brits se deelname goedgekeur het, is dit op voorwaarde dat hy nie voor Tiaan Liebenberg of Deon Fourie as haker gekies mag word nie.
Blackadder het intussen ’n fikse All Black-kaptein, Richie McCaw, weer in sy beginspan ingesluit. Hy vervang Matt Todd as oopkantflank in die enigste verandering aan die span wat die Sharks verlede week met 36-8 in hul kwarteindstryd in Nelson geklop het.
Die Crusaders put ook vertroue uit die vorige kragmeting met die Stormers – in Mei, wat die Kiwi’s met 20-14 gewen het.
“Almal was trots op daardie vertoning en ons weet nou ons kan hier wen, maar verlede jaar het die Stormers 40 punte teen ons aangeteken,” het Blackadder gesê.
“Hierdie is ’n halfeindstryd en die ingesteldheid gaan anders wees. Jy móét wen.
“Ek dink ons bring hierdie keer ’n sterker span Kaap toe. Verlede keer het ons nie vir Richie, Dan Carter, Brad Thorn of Sam Whitelock beskikbaar gehad nie. Ons het in die wedstryd ook baie beserings opgedoen.”
Die All Black-haker Corey Flynn speel sy 100ste wedstryd vir die Crusaders en dit sal die Kiwi’s verder motiveer.
McCaw se terugkeer beteken ook dat elke lid van die Crusaders se agttal al toetservaring het.
Agter hulle is ’n skakelpaar van Andy Ellis en Dan Carter, en ’n middelveld met Sonny Bill Williams en Robbie Fruean.
“Ons het ons sterkste moontlike span gekies. Richie se terugkeer gee vir ons nóg ’n wêreldgehalte-speler,” het Blackadder gesê.
“Hy het volkome van sy voetbesering herstel en om hom op hierdie tydstip van die seisoen in die span in te sluit is fantasties vir ons.
“Richie kan vir 80 minute speel en is sielkundig sterk. Die spankeuse is eintlik voorspelbaar.”
Blackadder meen die Crusaders is in ’n baie beter posisie as verlede jaar toe hulle teen die Bulls in die halfeindronde verloor het.
“Verlede jaar het ons teen die halfeindronde hinkepink geloop, maar dié jaar is dinge anders. Ons bou nou al vir drie jaar en die span is sielkundig sterk.”
Die Crusaders-span is: Tom Marshall, Sean Maitland, Robbie Fruean, Sonny Bill Williams, Zac Guildford, Dan Carter, Andy Ellis, Kieran Read, Richie McCaw (k), George Whitelock, Sam Whitelock, Brad Thorn, Owen Franks, Corey Flynn, Wyatt Crockett. PLAASVERVANGERS: Quentin MacDonald, Ben Franks, Luke Romano, Matt Todd, Kahn Fotuali’i, Matt Berquist, Ryan Crotty.
Vir die jongste sportnuus volg Nuus24Sport op Twitter.
– Sport24