Coenie nog nie in vyfde rat
2011-05-05 09:52
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Bloemfontein - Hy speel dalk ’n hond uit ’n bos met sy brute krag en gansdans-passies in die Super Rugby-reeks, maar die Cheetahs se stut-sensasie Coenie Oosthuizen is nog glad nie tevrede met sy spelpeil nie.
Die belowende Oosthuizen is terdeë bewus van sy tekortkominge, is oorgehaal om weekliks te verbeter en daarom kan die Lions môre in Johannesburg behoorlik deurloop.
Dié jong Springbok-stut het verlede naweek hier met sy goeie vertoning teen die Brumbies gewys dat hy vroeër as die meeste stutte volwassenheid op senior vlak bereik het.
Hoewel dié 22-jarige speler as ’n toekomstige Bok-staatmaker beskou word, sal Peter de Villiers, die Bok-breier, waarskynlik ’n fout begaan as hy Oosthuizen nie later vanjaar saamneem na die Wêreldbeker-toernooi nie.
Buiten Oosthuizen se individuele spelpeil, sal die Lions boonop met die Cheetahs se sterkste voorry vanjaar te doen kry.
Benewens Oosthuizen, maak die Bok-haker Adriaan Strauss ’n verskil in die besoekers se voorry en speel die stut WP Nel ook goeie rugby.
Oosthuizen sê hy strewe na ’n foutlose vertoning en daarom kan hy nog beter vertoon.
“Ek is nie 100 persent tevrede met my spelpeil nie,” het hy gesê.
“Daar is beslis nog ’n paar dinge waaraan ek kan werk.”
“Maar ek fokus nie te veel op my eie spel nie en gee meer om oor wat die span vermag.
“Ons het gelukkig ’n goeie uitslag teen die Brumbies gekry en wil met die selfvertroue wat ons uit dié kragmeting gekry het, die Lions aanpak,” sê Oosthuizen.
Hoewel hy bekend is vir sy stormlopies en inklimspel, is goeie skrumwerk volgens dié Bok-stut sy eerste prioriteit. “Ek wil altyd my skrumwerk 100 persent reg hê. Ek het aan die begin van die reeks te veel strafskoppe in dié afdeling afgestaan.
“Ek wou bitter graag teen die Brumbies geen strafskoppe afstaan nie, maar het ongelukkig een afgestaan,” sê hy.
Dié kragman meen die strenger toepassing van die reëls by die skrums lei daartoe dat loskoppe meer gestraf word. “Daarom is dit deesdae die loskop se werk om toe te sien daar is nie strafskoppe vir skrumwerk nie.”
Dié oud-leerling van Grey-kollege meen die Cheetahs se skrums het aansienlik verbeter, maar dat hulle geensins kan ontspan nie.
“Ons het swak begin en onsself opgewerk, maar daar is nie een naweek dat jy kan ontspan nie. Die Lions skrum goed. Ek het agting vir hulle en ons sal op ons stukke moet wees.”
Hy sê Strauss, wat lank vanweë ’n handbesering buite aksie was, se terugkeer is verblydend. Strauss was teen die Brumbies die eerste keer weer in die beginspan.
“Ek en Adriaan het ’n goeie verstandhouding,” sê Oosthuizen.“Wat skrumwerk betref, is hy een van die beste hakers.”
Vir die jongste sportnuus volg Nuus24Sport op Twitter.
- Sport24