Cheetahs wil Lions voorlangs pak
2010-05-14 08:47
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Jóhann Thormählen
Bloemfontein - Die Cheetahs-voorry wil Saterdag in Welkom hul Super14-reeks op ’n hoë skrumnoot afsluit.
Dié rugbyspan se skrumwerkers het aanvanklik in 2010 gesukkel om op dreef te kom, maar kan in hul laaste kragmeting met die onervare Lions daarvoor vergoed.
Volgens WP Nel (vaskopstut) van die Cheetahs is hy en sy spanmaats oorgehaal om ’n vyfde sege te behaal én sal ’n bobaas-skrumvertoning dit soveel soeter laat smaak.
“Dis beslis in ons planne om die Super14 op ’n hoë noot af te sluit en ons wil graag die Curriebeker-reeks met baie selfvertroue binnegaan.
“Daarom is dit ook vir ons ’n belangrike kragmeting vir skrumwerk in aanloop tot die Curriebeker-reeks,” sê hy.
Skrums was voor die aanvang van die reeks ’n afdeling waarin die Cheetahs teenstanders wou opdreun en daar is veral ná die Vrystaat se sukses in 2009 se Curriebeker-reeks hoë verwagtinge gekoester.
Die Vrystaat se voorry – Wian du Preez, Coenie Oosthuizen, (albei loskopstutte), Adriaan Strauss (haker, nou beseer) en Nel – was boonop dieselfde manne wat vir die Cheetahs in die Super14-reeks in die skrum sou sak.
Dié aanslag het egter in hul eerste wedstryd hier teen die Bulls ’n terugslag beleef toe die besoekers die Cheetahs in trurat gehad het. Die span se skrum-laagtepunt was op sy oorsese toer teen die Crusaders toe selfs sy breier, Naka Drotské, erken het dat sy manne ’n skrumles gekry het.
Maar sedert die Cheetahs se gelykopuitslag teen die Chiefs het dit ook in die skrums baie beter gegaan.
Nel meen daar is geen verskonings vir hul aanvanklike sukkel-skrumsvertonings nie.
“Ons kan net daaruit leer. Ons vat dit op die ken en wil graag daarop voortbou.”
Dié bulletjie sê iets wat waarskynlik ’n rol daarin gespeel het, was dat beserings hulle weekliks ontwrig het.
“Ons het daarom selde met dieselfde pak geskrum.”
Volgens Nel sal dit beslis in die Curriebeker-reeks beter gaan en is môre se stryd ’n gulde geleentheid om met dié aanslag te begin. En wie beter as ’n segelose Lions-span om dit teen te doen.
Die Cheetahs mag self nie vanjaar met hul skrumvertoning tevrede wees nie, maar dié afdeling moet sekerlik as een van die besoekers se baie leemtes beskou word.
Name soos Ross Geldenhuys (vaskopstut), Charles Emslie (haker) en JC Janse van Rensburg (loskopstut) van die Lions het in 2010 min teenstanders slapelose nagte gegee.
Nel sê die Lions het ook vanjaar weens hul rotasie-beleid gesukkel om hul ritme in die skrums te vind.
“Ons sal hulle beslis voor aanvat en goeie besit vir ons agterspelers gee om mee te hardloop.”
Bly op hoogte van al die jongste sportnuus deur Nuus24Sport op Twitter te volg.
- Sport24