Cheetahs kies super-bank vir stryd teen Lions
2011-03-09 09:24
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Bloemfontein - Die Cheetahs se sterkste impakbank vanjaar kan Saterdag hier in die Super Rugbyreeks die uitklophou teen die Lions plant.
Die sentrale streekspan draf in die Vrystaat-stadion in sy vierde wedstryd met waarskynlik sy sterkste groep plaasvervangers uit.
Spelers soos die stut Lourens Adriaanse, losvoorspeler Kabamba Floors en veelsydige agterspeler Philip Burger behoort in die laaste paar minute ekstra vonk te verskaf.
Sport24 het reeds Dinsdag berig die losskakel Sias Ebersohn sal ten koste van Naas Olivier, wat die Cheetahs-kaptein teen die Stormers was, ingespan word.
Olivier is ’n plaasvervanger en daarom sal die senter Andries Strauss die Cheetahs aanvoer.
Naka Drotské, die Cheetahs-breier, het vyf veranderinge aan sy beginspan, wat met 15-21 teen die Stormers vasgeval het, gemaak.
Die ander nuwelinge is die heelagter Riaan Viljoen, die slot Martin Muller, asook die flanke Philip van der Walt en Frans Viljoen.
Volgens Drotské moet Frans Viljoen (dyspier), Adriaanse (bors) en Burger (kuit) nog fiksheidstoetse slaag. Die Cheetahs moes hier in hul nederlaag van 23-25 teen die Bulls leer ’n kragmeting word met 22, en nie 15 spelers nie, gewen.
Bulls-plaasvervangers soos die Bok-slot Flip van der Merwe en -losvoorspeler Danie Rossouw het hul span gehelp om die Cheetahs van ’n sege te beroof.
Verder kon impakspelers teen die Stormers ook dalk ’n verskil gemaak het.
Veral Floors, wat ’n staatmaker in die beginspan was, en Burger kan in die tweede helfte teen die Lions amok maak.
Burger het van ’n kuitbesering herstel, maar Philip Snyman het meer as sy man teen Bok-vleuels soos Bjorn Basson van die Bulls en Bryan Habana van die Stormers gestaan.
“Ons voel Philip Snyman het sy kans aangegryp en Philip Burger moet homself eers bewys,” sê Drotské.
Verder verskaf Adriaanse van Griekwas en Olivier ook meer slaankrag as plaasvervangers.
Adriaanse het verlede jaar vir die Maties uitgedraf en hy sal die streekspan se stut-diepte aanvul. Hy vervang Kobus Calldo.
Adriaanse het al verlede week saam met die Cheetahs se vergrote groep geoefen, maar sy bors in ’n skrumsessie seergemaak.
Drotské verduidelik Riaan Viljoen en Ebersohn se insluiting só: “Hoewel Naas teen die Stormers goed na die pale geskop het, is sy taktiese spel nie heeltemal op dreef nie.
“Ons wil die druk van hom afhaal en Sias verdien ’n kans.
“Hennie sal saamstem dat hy nie dieselfde peil as verlede jaar handhaaf nie.
“Ons het ook vroeër gesê ons gaan spelers in sekere posisies soos heelagter roteer.
“Daar is min tussen Hennie (Daniller) en Riaan te kies. Boonop gee Riaan jou die keuse van verder skoppe na die pale.”
Die Cheetahs-span is: Riaan Viljoen, Philip Snyman, Robert Ebersohn, Andries Strauss (k), Rayno Benjamin, Sias Ebersohn, Sarel Pretorius, Ashley Johnson, Philip van der Walt, Frans Viljoen, Wilhelm Steenkamp, Martin Muller, WP Nel, Ryno Barnes, Coenie Oosthuizen.
PLAASVERVANGERS: Skipper Badenhorst, Lourens Adriaanse, Francois Uys, Kabamba Floors, Tewis de Bruyn, Naas Olivier, Philip Burger.
Bly op hoogte van al die jongste sportnuus deur Nuus24Sport op Twitter te volg.
- Sport24