Cheetahs jag vyfde sege
2010-05-13 10:14
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Jóhann Thormählen
Bloemfontein - Die Cheetahs-span weier om die Lions se enigste slagoffer in 2010 se Super14-rugbyreeks te wees.
Só sê Naka Drotské, breier van die Cheetahs, oor sy span se laaste kragmeting Saterdag in Welkom.
Hoewel dié wedstryd gelukkig nie meer vir die Cheetahs ’n houtlepel-stryd is nie, is daar steeds genoeg op die spel om hulle aan te spoor.
Vir die tuisspan wink een van sy beste reekse nog en sal hy sy onlangse goeie peil moet volhou as hy nie weer die etiket van Lions-prooi wil dra nie.
As die streekspan teen die Lions sy vyfde sege van 2010 behaal, sal dit sy beste reeks, in 2006, ewenaar.
Volgens Drotské is sy spelers oorgehaal om dit een van hul beste reekse nog te maak.
“Dis ’n moeilike situasie vir ’n afrigtingspan as jy ’n laaste wedstryd het waarin daar niks op die spel is nie. Die spelers weet dat ons die momentum wat ons in die laaste paar wedstryde opgebou het enduit moet behou.”
Die breier sê sy span wil beslis nie die Lions hul enigste sege van die reeks besorg nie.
“As ons Saterdag kan seëvier, sal ons die reeks goed afsluit. Ek het vir die spelers gesê as ons verloor, sal ons die enigste span wees wat teen die Lions vasgeval het. Dus is daar baie op die spel.
Die laaste drie wedstryde het baie vir ons selfvertroue en ook (ons vertoning in) die reeks beteken.”
Drotské meen daar is vir hul teenstanders genoeg om hulle aan te spoor.
“Dis ’n professionele spel en ’n ou speel vir jou loopbaan. Baie van die Lions speel vir kontrakte en boonop het hulle niks om te verloor nie. Hulle speel ook om nie die eerste span te word wat glad nie ’n wedstryd in ’n Super14-reeks wen nie.”
Ondanks die feit dat ’n sege vir Cheetahs-ondersteuners ononderhandelbaar is, sal die span ’n fout begaan as hy daaraan dink om net “op te daag”. Die Lions het die resep om die Cheetahs te klop.
Van hul drie ontmoetings in die reeks kon die Cheetahs slegs die eerste in 2007 wen toe hulle met 16-10 in Johannesburg aan die wenkant was.
Die Lions was in 2008 hier met 23-22 en in 2009 in Johannesburg met 34-28 baas. Volgens Drotské sal dié Suid-Afrikaanse derby-stryd kliphard wees.
“Dit gaan nie oor waar ’n span op die puntelys lê nie.
“Die Sharks het dit teen die Bulls en die Stormers gewys,” sê Drotské.
Bly op hoogte van al die jongste sportnuus deur Nuus24Sport op Twitter te volg.
- Sport24