Cheetahs glo hul kan Lions se Kiwi keer
2011-03-12 10:34
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Bloemfontein - Die Lions se Kiwi-towenaar moet die Cheetahs vandag hier dronk hardloop, maar as die tuisspan se mees fisieke agterlyn in vier jaar op dreef is, kan dit dié besoeker wees wat die Vrystaat-stadion disnis verlaat.
Die Gautengers het die gevaarlike Nieu-Seelander James Kamana in Jaco Taute se plek op heelagter ingesluit vir vandag se Super Rugby-wedstryd.
Tog draf die Cheetahs volgens Naka Drotské, die Cheetahs se breier, met een van hul beste agterlyne in jare hier uit, veral wat verdediging betref.
Die senter Andries Strauss sal nie net die tuisspan die eerste keer aanvoer nie, maar ook aan die spits moet wees as dit by sy span se duikwerk kom.
Strauss is bekend vir sy harde duikslae en dit was ook sy verdediging wat hom einde verlede jaar, toe hy nog ’n Shark was, ’n Springbok laat word het.
Hoewel die besoekers, nes die Cheetahs, steeds segeloos is, is die Lions nie bang om met spelers soos Kamana die bal te dra nie. Daarom meen Drotské sy span sal soos verlede week teen die Stormers moet duik.
Ondanks ’n onaanskoulike kragmeting waarin Drotské-hulle met 15-21 verloor het, kon die Cheetahs daarin slaag om die Stormers van hul doellyn af weg te hou. “Ons verdediging moet net so goed soos teen die Stormers wees. Die Lions sal enige span se verdediging toets, aangesien hulle daarvan hou om die bal wyd te speel en ’n goeie aanvallende span is,” sê Drotské. Maar dié breier het vanjaar meer vertroue in sy agterhoede as ander jare.
“Veral ons agterlyn se verdediging is goed. Met Andries op binnesenter en Robert (Ebersohn) op buitesenter is dit moeilik om ons in die middelveld te klop – hulle is spesialis-verdedigers en ons vleuels keer ook goed. Ons agterlyn is, wat die verdediging betref, die beste wat ons in sowat vier jaar gehad het. Ons vleuels, Rayno (Benjamin) en Philip (Snyman), is baie fisiek en pas goed in ons verdedigingstelsel in. Hulle weet presies hoe ons wil verdedig.”
John Mitchell, die Lions se breier, meen Kamana bied meer op die aanval as Taute.
Kamana het in die eerste paar wedstryde as impakspeler beïndruk en die Cheetahs sal hom en die regtervleuel, Lionel Mapoe, moet dophou.
Mapoe gaan allesbehalwe ’n hartlike ontvangs van sy voormalige spanmaats en ondersteuners op sy ou tuisveld kry. Hy het vandeesweek ’n dwarsklap in hul rigting gemik. Hy het gesê hy gee nie om wat mense hier van hom dink nie nadat hy lank in ’n kontrakgeskil tussen die Cheetahs en die Sharks betrokke was.
Die spanne is:
Cheetahs: Riaan Viljoen, Philip Snyman, Robert Ebersohn, Andries Strauss (k), Rayno Benjamin, Sias Ebersohn, Sarel Pretorius, Ashley Johnson, Philip van der Walt, Heinrich Brüssow, Wilhelm Steenkamp, Martin Muller, WP Nel, Ryno Barnes, Coenie Oosthuizen.
Plaasvervangers: Skipper Badenhorst, Kobus Calldo, Francois Uys, Kabamba Floors, Tewis de Bruyn, Naas Olivier, Fabian Juries.
Lions: James Kamana, Lionel Mapoe, Waylon Murray, Doppies La Grange, Michael Killian, Elton Jantjies, Rory Kockott, Warren Whiteley, Josh Strauss, Derick Minnie, Franco van der Merwe (k), Wikus van Heerden, Patrick Cilliers, Bandise Maku, JC Janse van Rensburg.
Plaasvervangers: Martin Bezuidenhout, Kevin Buys, Michael Rhodes, Cobus Grobbelaar, Michael Bondesio, Burton Francis, Jaco Taute.
Skeidsregter: Keith Brown.
Afskop: 17:05.
- Volg Nuus24Sport op Twitter.