Cheetahs betaal duur vir Blues-sege
2010-05-03 09:14
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Bloemfontein - Die Cheetahs het eergister hier teen die Blues onder leiding van Juan Smith met hardlooprugby waarskynlik hul beste vertoning tot nog toe in die Super14-reeks gelewer.
Hoewel die tuisspan met vyf drieë en ’n telling van 36-32 oor die besoekers gewys het dat hy steeds kan aanval, het die sege nog slagoffers weens beserings geeïs.
Frans Viljoen (agtsteman) en Jongi Nokwe (vleuel) het duur vir hul begeesterde vertoning betaal.
Viljoen het sy linkerarm en Nokwe sy kakebeen gebreek en sluit hulle by ’n lang krukkelys aan.
Volgens Ian Morris, die Cheetahs se spandokter, is Viljoen, wat teen die Blues sy terugkeer van ’n wangbeenbesering gemaak het, gister geopereer en sal hy sowat drie maande uit wees.
Morris sê Nokwe sal vandag ’n spesialis sien, maar behoort die res van die reeks mis te loop en betyds vir die Curriebeker-reeks herstel.
Die Super14 is dalk byna verby, maar dié beserings haal nog pyle uit die Cheetahs se koker.
Dié twee het hoeka teen die Blues ’n bydra tot hul span se verbeterde aanvalspoging gelewer en sal beslis gemis word.
Die Cheetahs het vanjaar gesukkel om drieë te druk, maar dit in hul agterplaas selfs meer as ’n gevaarlike Blues-span reggekry.
Voor die wedstryd kon die Suid-Afrikaanse streekspan slegs 16 drieë, die minste deur enige span in die reeks, druk.
Smith (flank), Viljoen, Bjorn Basson (vleuel) en Sarel Pretorius (skrumskakel) het die Blues laat bontstaan.
Volgens Hawies Fourie, agterlyn-afrigter van die Cheetahs, het sy span aansienlik beter op die aanval gelyk.
“Ons het hard daaraan gewerk om ons strukture vanaf tweede, derde en vierde fases reg te kry. Teen die Blues het ons lekker oor die veld gesprei. Almal het geweet wat hulle moet doen en dis beslis die vrugte van die laaste twee weke se harde werk.”
Die breier meen Basson, wat weens persoonlike redes nie oorsee getoer het nie, het gewys hoekom hy in die span hoort.
“Bjorn het in die eerste helfte teen die Reds én ook teen die Blues gewys wat hy kan doen.
“Ons het eers Woensdag begin oefen,” het Fourie verder gesê.
“Hy het basies Woensdag twee sessies, Donderdagmiddag een en Vrydag die kapteinsoefening saam met die span gehad.
“Dit wys net watter goeie speler hy is en dis jammer dat ons hom nie oorsee gehad het nie, maar darem kan ons hom nou weer gebruik.”
Puntemakers:
Cheetahs: 36 (22) Drieë: Juan Smith, Jongi Nokwe, Bjorn Basson, Philip van der Walt, Waltie Vermeulen. Doelskoppe: Naas Olivier (2), Meyer Bosman (2). Strafdoel: Olivier.
Blues: 32 (13) Drieë: Isaia Toeava, Rene Ranger, Alby Mathewson, Anthony Tuitavake. Doelskoppe: Stephen Brett (3). Strafdoele: Brett (2).
- Sport24