Butch, Jean glo op Leeus se inkopielys
2010-05-11 09:10
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pieter Jordaan
Johannesburg - Minstens twee super-Springbokke is glo op die Goue Leeus se inkopielys, wat ’n vroegtydige pynstiller vir die unie se rugby-kopseer kan bring.
Die Leeus het twee van 2007 se Wêreldbeker-wenners, die binnesenter Jean de Villiers en die losskakel Butch James, in hul visier en dit is ’n weerspieëling van hoe vasbeslote die uniebestuur is om sake drasties te verander.
Volgens betroubare bronne oorweeg albei dié spelers dit om hulle by die Leeus aan te sluit.
Dit is waarskynlik nie al spelers wat die Leeus vanjaar wil lok nie.
Hoewel die GLRU nie die onderhandelinge wil bevestig of ontken nie, het Kevin de Klerk, die GLRU-president, gesê dat daar met borge gepraat word wat ’n rol kan speel om sulke spelers te lok.
Die Springbok-kaptein, John Smit, was glo vroeër vanjaar met Muir in gesprek oor ’n moontlike rol by die Leeus waarin hy ’n verantwoordelikheid as voorspeler-afrigter én speler kan dra.
Daar word ook oor Smit se Sharks-spanmaats Bismarck en Jannie du Plessis se moontlike skuif bespiegel.
Hul kontrakte bepaal glo dat albei spelers saam geakkommodeer moet word.
Die naam van die Bok-agtsteman Joe van Niekerk word ook in die wandelgange genoem.
De Klerk sê die Leeus sal hul spelers- en afrigterskorps móét aanvul om voortaan met die Super14-swaargewigte mee te ding.
“Ons kan nog nie name noem nie, maar ons het taamlik ver gevorder met die onderhandelinge. Van hulle (spelers) sal reeds vir die Curriebeker-reeks beskikbaar wees en van hulle aan die einde van die jaar.”
Muir, die Leeus se direkteur van afrigting, het gereeld as Springbok-agterspeler-afrigter met De Villiers gewerk en James en Muir het noue bande by die Sharks gehad.
De Villiers speel met welslae vir Munster in Ierland en James blink uit vir Bath in Engeland. Maar die geelwortel van plekke in volgende jaar se Springbok-span vir die Wêreldbeker-toernooi in Nieu-Seeland, kan ’n rol speel om hulle na Suid-Afrika te laat terugkeer.
James het verlede week sy mond uitgespoel oor die beweerde swak wyse waarop die Sharks met hom onderhandel het om hom na Durban terug te lok.
Tóg het hy vantevore gesê hy sal nie sommer vir enige ander span as die Sharks speel nie.
De Villiers het vanjaar besluit om nie sy kontrak met Munster te verleng nie en keer eersdaags na Suid-Afrika terug. Hy het onlangs gesê dat dit moeilik sou wees om vir enige spanne anders as die WP en die Stormers te speel.
Maar as die Leeus se aanbiedinge aanloklik is, kan De Villiers reeds in die Curriebeker-reeks vir die Rooibontes uitdraf.
Bly op hoogte van al die jongste sportnuus deur Nuus24Sport op Twitter te volg.
- Sport24