Bulls weet Kaplan vat g’n twak
2010-04-08 10:55
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria - ’n Bietjie slimmer speel en beter afrond.
Dít is die vernaamste opdragte wat die Bulls-afrigter, Frans Ludeke, vandag en môre in die koppe van sy ervare rugbyspan gaan indril vir die Super14-wedstryd teen die Chiefs in Hamilton.
Die Bulls se benadering van “week-vir-week” is steeds toepaslik, sê die breier en die teleurstelling van die nederlaag in Auckland is verby.
“Ons het klaar ons huiswerk oor die Chiefs gedoen,” het Ludeke gesê.
“Daar sal ’n poging van 80 minute van ons kant af móét wees en ons sal slimmer moet speel as wat die geval teen die Blues was. Dit gaan oor kanse skep en om dan af te rond. Teen die Chiefs sal jy kanse kry as jy die basiese dinge reg en goed doen.”
Die Bulls het die Chiefs verlede seisoen twee keer geklop en behoort dus te weet hoe daar takties teen hulle gespeel moet word, maar albei daardie wedstryde was op Loftus Versfeld.
Wat het dus verander? “Nie veel nie. Hulle is steeds ’n span wat goeie, afgeronde rugby speel en daar het nie veel verander aan die styl wat hulle tot in die eindstryd gebring het nie. Met Ian Foster steeds daar as afrigter het hulle ook goeie kontinuïteit in die reeks,” sê Ludeke.
Die Bulls het hulle in Auckland teen Craig Joubert se onverbiddelike fluitjie vasgeloop en veral Deon Stegmann het homself binne die eerste halfuur uit die wedstryd gespeel.
Jonathan Kaplan gaan nie “sagter” wees nie, maar volgens Ludeke besef sy span hy sal nie weer soveel strafskoppe kan afstaan nie.
Die Chiefs het intussen ook hul span aangewys. In die afwesigheid van Mils Muliaina, wat sy duim teen die Highlanders gebreek het, sal die kantman Liam Messam die span aanvoer.
Nog ’n All Black-flank, Tanerau Latimer, is terug in die span nadat hy van ’n besering herstel het, wat beteken dat die Bulls met drie internasionale spelers (Sione Lauaki is die ander) in die lostrio te doen gaan kry.
Daar is nog All Blacks, naamlik Brendon Leonard, Mike Delaney, Stephen Donald, Richard Kahui en Lelia Masaga, wat daarop dui dat die groot gevaar vir die Bulls agterlangs kan skuil.
Die Chiefs se span is:
Tim Nanai-Williams, Lelia Masaga, Richard Kahui, Stephen Donald, Dwayne Sweeney, Mike Delany, Brendon Leonard, Sione Lauaki, Tanerau Latimer, Liam Messam (k), Culum Retallick, Craig Clarke, Ben Afeaki, Hika Elliot, Sona Taumololo. PLAASVERVANGERS: Vern Kamo, Toby Smith, Jarrad Hoeata, Colin Bourke, Junior Poluleuligaga, Callum Bruce, Jackson Willison.
- Sport24