Bulls ‘vuur en vlam’ vir stryd teen Cheetahs
2012-02-08 10:01
In-diepte Verslae
Die Bok-stut Tendai "Beast" Mtwarira is terug vir die Sharks se Super-stryd teen die Bulls, nadat hy lank op die kantlyn was weens 'n besering.
Die Cheetahs se afrigter, Naka Drotské, het die versoeking weerstaan om Heinrich Brüssow in die 15-tal te kies vir die stryd teen die Higlanders.
Pretoria – Daar is vandeesweek ’n opgewondenheid en ’n doelgerigtheid in die Bulls-kamp en volgens Pierre Spies is Saterdag se wedstryd teen die Cheetahs in Polokwane een van die redes daarvoor.
Dié oefenwedstryd in die Peter Mokaba-stadion is vir talle Bulls-spelers, soos vir Spies, hul eerste proesel van rugby vanjaar en daarom, glo die nuwe leier van die trop, om meer as een rede belangrik.
“Dit was ’n lekker lang voorseisoen en ons het baie voorbereiding (vir die Super-seisoen) gedoen, maar wil nou speel. Almal sien dus uit na die wedstryd en ek dink dit behoort ’n goeie een te wees,” het die agtsteman gesê.
Sulke wedstryde is goeie rigtingwysers waar nog skaafwerk nodig is of wat reg gedoen is en Spies verwag dat hy en sy spanmaats heelwat antwoorde sal kry.
“Eerstens wil jy alles wat jy geoefen het, uitprobeer en sien hoe dit deur die reëls beïnvloed word.
“Tweedens wil jy momentum kry, vertroue opbou en mekaar begin verstaan. Ons is ’n klomp nuwe ouens en dit is belangrik om tyd saam op die veld in te kry,” meen die 26-jarige kaptein.
Hy is opgewonde oor die “nuwe” span, erken hy.
“Daar was baie aanpassings te maak, maar dit was nie so moeilik nie. Almal, die spelers, die bestuur en die afrigters, almal het dadelik in dieselfde rigting getrek en die oorgang só maklik gemaak. Dit is iets waaroor ek as nuwe kaptein baie dankbaar voor is.”
Spies is doelgerig oor waarheen die Bulls op pad is.
“Ons wil iets nuuts begin. Ons besef dit was die einde van ’n era, maar is gretig om ’n nuwe een te begin bou. Almal se energie is positief en ons is gretig om aan die gang te kom.”
Sy spanmaats voel ook só, verseker hy. “Daar is ’n stille opwinding en ’n mens wonder hoe dinge kan uitdraai. Ek is egter vol vertroue en vol geloof in die spelers wat ons het en is seker ons kan ’n goeie seisoen daarvan maak.”
Vanweë die verandering aan vanjaar se reeks is die Bulls se benadering noodwendig anders, het Spies laat blyk.
“Ons moes, want die formaat is anders.”
Die reeks word ook onderbreek vir die toetswedstryde.
“Dit verander die prentjie aansienlik. Ons beplanning neem dit in ag, maar die geheim gaan daarin lê om nie te ver vooruit te gaan met dinge nie. Doen die eerste dinge eerste en fokus op die week wat voor jou lê.”
Vir die jongste sportnuus volg Nuus24Sport op Twitter.
– Sport24
