Bulls-vreugde vir Victor
2010-04-10 07:17
In-diepte Verslae
Die beseerde losvoorspelers CJ Stander en Dewald Potgieter kan straks gekies word vir die Bulls se Super-stryd teen die Chiefs in Hamilton.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria - Die eina van verlede week was die groot aansporing in die Bulls se uitstekende oorwinning oor die Chiefs in Hamilton, het die Super14-rugbyspan se kaptein, Victor Matfield, gesê nadat die Bulls met 33-19 gewen het.
Die besoekers het verlede week nie teen die Blues oortuig nie, maar het gister heelwat beter gespeel om hul eerste oorwinning tot nog toe in Hamilton te behaal.
“Ons was nie tevrede met die manier waarop dinge in Auckland verloop het nie en was baie teleurgesteld met ons poging daar,” het Matfield erken.
“Die ouens het vanaand (gister) gewys daar is baie karakter in die span. Hulle wou vergoed vir daardie vertoning en het baie ingesit om dit reg te kry.”
En om die Hamilton-juk af te skud, is ’n bykomende pluspunt, meen hy.
“Dit was great om hier te wen. Enige oorwinning in Nieu-Seeland is iets besonders.
“Dit is die moeilikste plek ter wêreld om in te toer en te wen, dus is ons baie tevrede met ons vertoning vanaand (gister).”
Volgens Matfield begin die harde werk weer Maandag. “Ons is tevrede, maar volgende week wag daar weer ’n hoë hekkie teen die Reds.
Ons het nou ’n langnaweek en vlieg Brisbane toe, maar sal weer Maandag die oefenveld met mening tref. Dan begin die harde werk weer van voor af.”
Matfield was vol lof vir Pierre Spies en Gurthrö Steenkamp, wat albei hul 50ste wedstryd vir die Bulls gespeel het.
“Pierre en Gurthrö het soveel vir die Bulls gedoen; dit is fantasties dat hulle dié mylpaal met so ’n goeie oorwinning kon vier.
“Sulke mylpale word nie aan ’n groot klok gehang by die Bulls nie, maar albei kan tevrede voel oor hoe hulle dit gevier het.”
Die Bulls moes kort voor die afskop vinnig spring om Jaco van der Westhuyzen te vervang nadat hy tydens die opwarmsessie ’n kuitspier gerek het.
Jaco Engels (stut) het hom vervang en selfs laat in die wedstryd speelkans gekry. Engels se vorige verskyning vir die Bulls was in verlede seisoen se reeks.
- Sport24