Bulls vra Bakkies-vuur
2011-03-24 07:05
In-diepte Verslae
Die Brumbies-losskakel, Zack Holmes, se onsuksesvolle strafdoel in die laaste minuut het die Reds met 'n enkele punt in Canberra laat wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria - Sy bloedbroer, Victor Matfield, hoop nie die uitwysing van Bakkies Botha gaan dié ou grote se vuur komende Saterdag teen die Lions blus nie.
Botha is Saterdagaand ná die Stormers-nederlaag deur Sanzar se uitwysingsbeampte in Suid-Afrika, Freek Burger, uitgewys, maar dit is Dinsdag vinnig deur ’n Sanzar-tugkomitee verwerp.
Botha kan dus die naweek deel hê aan die Jukskei-derby.
“Ek kan maar net hoop daardie uitwysing beïnvloed nie Bakkies se spel nie.
“Ek was baie verbaas toe ek hoor hy is uitgewys.
“ Ek was van mening dat daar ander voorvalle in die wedstryd was wat moontlike uitwysing tot gevolg sou hê, maar beslis nie Bakkies se duikslag nie,” het Matfield hier gesê.
“Ek weet Bakkies is baie vasbeslote om nie weer in voorvalle betrokke te raak nie en wil op die reguit pad bly.
“Ons het ’n vurige Bakkies nodig Saterdag.”
Dit is duidelik, ná agtereenvolgende nederlae (op Loftus nogal), dat die Bulls meer as net ’n vurige Botha nodig het om weer sy sprankel te herwin en Matfield het toegegee dat ’n paar spanmaats moet vinger trek.
“Dit is nie net die senior spelers nie, maar almal.
“Daar is geweldige verwagtinge vir die span van ondersteuners en die span self en om daaraan te voldoen, móét almal volgens hulle potensiaal speel, die topspelers inkluis.”
Matfield sê die span glo steeds in wat hy doen en wat hy kan bereik en vra die ondersteuners om dieselfde te doen.
Een speler wat nie vir die volgende paar maande terug sal wees nie is Gurthrö Steenkamp en die Bulls-afrigter, Frans Ludeke, het gister Dean Greyling se naam as loskop uitgelees toe hy sy span vir die Lions-stryd aangekondig het.
“Gurthrö is beslis ons voorste loskop en dit is ’n gevoelige slag om hom te verloor, maar dit gaan so in rugby. Gelukkig het Dean goed herstel ná sy besering en ons weet hy sal sy kant bring,” het Ludeke gesê.
Greyling se vertonings in verlede jaar se Curriebeker-reeks het hom deel gemaak van die Springbokke se groter oefengroep en “Wors”, soos hy hier genoem word, sal sekerlik sy eerste geleentheid in vanjaar se Super-reeks wil aangryp om sy nasionale aandele te behou.
Jaco van der Westhuyzen sal heelagter speel as Zane Kirchner nie teen Vrydag van sy skouerbesering herstel het nie.
Dié veteraan-agterspeler het nog nie vanjaar enige aksie gesien nie.
Vir die jongste sportnuus volg Nuus24Sport op Twitter.
- Sport24