Bulls se oë op Stormers
2011-05-20 07:27
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria - Die Bulls sal Vrydagoggend asem ophou om te sien of die erg mank Stormers die pas in die Suid-Afrikaanse groep van Super Rugby kan bly aangee – en of ’n nederlaag teen die Blues die gaping tussen die top-drie gaan verklein.
Sowel die Sharks as die Bulls kan voordeel trek uit ’n Stormers-nederlaag, iets wat Saterdag se stryd in Durban tussen hulle met ’n oktaan of twee sal laai.
Dit is juis die verwagte toets-atmosfeer wat die besoekers ’n mate van gerusstelling sal gee, want volgens die Bulls se skop-afrigter, Vlok Cilliers, is húl skopper een wat reeds oral ter wêreld gewys het hy het die temperament vir die groot oomblik.
Cilliers het Donderdag hier tydens die bekendstelling van ’n nuwe skopreeks vir skole, waarmee hy en die Bulls-losskakel, Morné Steyn, nóg skerpskutters wil kweek, gesê Steyn se skopvoet sal in enige wedstryd waain hy speel ’n faktor wees.
“Ek glo jy kies jou skopper eerste en dan die res van jou span. Hoeveel groot bekers is nie al gewen deur ’n akkurate skopper nie?
“Die Bulls is gelukkig dat hulle Durban toe gaan met iemand soos Morné, wat ure spandeer om sy hoë standaarde te handhaaf,” het Cilliers gesê.
Die 26-jarige Steyn speel in sy sewende wedstryd teen die Sharks in Super-rugby.
Hy was nog net twee keer aan die verloorkant en het 63 punte in daardie wedstryde aangeteken.
In sy vorige verskyning op dié vlak in Durban het Steyn die Sharks vroeg met twee skepdoele onder druk gehad en sodoende ’n sege vir sy span bewerkstellig.
“Ek gaan nie voor die tyd op die veld met die idee om vandag skepskoppe deur die pale te jaag nie,” het Steyn gister vertel.
“Dit is ’n geval van die situasie opsom en daarvolgens speel. Baie keer, soos met die Sharks, is die teenstanders se verdediging van so ’n aard dat daar nie deurkomkans is nie.
“Dan moet ’n mens maar die telbord en momentum aan die rol hou met ’n skepdoel.”
Altesame 3 van sy 20 Superrugby-skepdoele is teen die Sharks aangeteken en volgens hom wil hy dié getal opstoot, sou die situasie dit van hom verg.
Steyn se punte sal waarskynlik ook van die skopkegel af aangeteken word, maar volgens hom is dit nie iets wat hy noodwendig ander skoppers toewens nie.
“Durban en Kaapstad is moeilike plekke om te skop.
“Die wind warrel op ’n snaakse manier in die Kingspark-stadion en die weer is dikwels onvoorspelbaar.
“Die humiditeit pla ook en dan trek die bal natuurlik nie so ver soos hier op die Hoëveld nie,” het Steyn gesê.
“Dis boonop ’n derby en die ouens wil mekaar breek.
“Ons uitdaging gaan wees om te fokus op dit wat ons wil bereik in die wedstryd en nie op jou teenstander nie.”
Steyn verwelkom die terugkeer van Butch James en die uitdaging wat Patrick Lambie bied. “Dis goed vir almal, want kompetisie bring die beste uit almal. Geen losskakel in die land mag op sy louere rus nie.”
Vir die jongste sportnuus volg Nuus24Sport op Twitter.
- Sport24