Bulls-pak in Cheetahs-pad
2011-05-28 08:40
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria - Op Loftus Versfeld laat die sweet en bloed van vaste voorspelers die gras soos sprinkelbesproeiing groei.
Springbok-rugby is gewoonlik gegrond op oorheersing deur die voorspelers en dieselfde geld Saterdag hier in die Super Rugby-wedstryd tussen die Bulls en die Cheetahs.
Die Bulls se voorspeler-masjien staan vierkant voor ’n Cheetahs-span met ’n huppel in sy stap.
Ná ’n rekordgetal van vier agtereenvolgende seges kon die besoekers kwalik met meer selfvertroue hierheen gereis het, maar die Bulls het verlede naweek weer na ’n kampioenspan begin lyk. Hul voorspelers het die Sharks se fisieke pak soos in die ou dae geboelie.
Hoewel die tuisspan se voorspelertaktiek dikwels as voorspelbaar afgemaak word, bly dit doeltreffend. Victor Matfield, die Bulls-kaptein, en die res van dié span se vaste vyf gaan probeer om die Cheetahs-kaptein, Adriaan Strauss, en sy manne te karnuffel.
Die Bulls sal eerste in die lynstane ’n slag wil slaan, aangesien die Cheetahs uitgedun is op slot. Met Wilhelm Steenkamp (knie), Waltie Vermeulen (harsingskudding) en Izak van der Westhuizen (lies) uit weens beserings, moet Martin Muller, Francois Uys en die plaasvervanger Hendrik Roodt die mas opkom. Hoewel die uitslag van ’n kragmeting nie direk deur skrums bepaal word nie, verskaf dié faset belangrike momentum.
Die Cheetahs se voorry – Strauss (haker) en die stutte Coenie Oosthuizen en WP Nel – het hul beste peil onder leiding van Os du Randt, hul skrumdokter, in dié afdeling begin bereik.
Maar die Bulls wil voortbou op hul goeie skrumwerk teen die Sharks. Boonop het die Bulls sterk plaasvervangers wat ’n impak kan maak en waarmee hulle wéér, soos in die spanne se eerste derby-wedstryd, die uitklophou kan plant. Plaasvervangers soos die Bokke Gary Botha (haker), Flip van der Merwe (slot) en Danie Rossouw (flank) brand om op die veld te kom.
“Hulle (die Bulls) sal altyd ’n goeie bank hê, maar het ook ’n goeie beginspan. In die vorige wedstryd teen die Bulls het die geelkaart teen die einde volgens my ’n groter invloed op die uitslag gehad as die Bulls se bank,” sê Naka Drotské, die Cheetahs se afrigter. Volgens dié breier is Roodt, wie se rolmodel Bakkies Botha is, die regte man om die Bulls te pak.
“Ons het Hendrik voor die aanvang van die seisoen hoog aangeskryf, maar hy het hier aangekom met ’n kniebesering en was oorgewig. Daarom het ons hom eers teruggestuur Griekwas toe. Intussen het Francois Uys en Martin Muller hul kanse aangegryp.
Teen die Bulls is Hendrik die ideale ou om op die plaasvervangersbank te hê. Hy is baie fisiek en het die eienskappe van ’n Bakkies Botha.”
Die spanne is:
Bulls: Zane Kirchner, Akona Ndungane, Jaco Pretorius, Wynand Olivier, Bjorn Basson, Morné Steyn, Francois Hougaard, Pierre Spies, Dewald Potgieter, Deon Stegmann, Victor Matfield (k), Bakkies Botha, Werner Kruger, Chiliboy Ralepelle, Dean Greyling. PLAASVERVANGERS: Gary Botha, Rossouw de Klerk, Flip van der Merwe, Danie Rossouw, Dustin Jinka, Francois Brummer, Gerhard van den Heever.
Cheetahs: Riaan Viljoen, Riaan Smit, Robert Ebersohn, Corné Uys, Philip Snyman, Sias Ebersohn, Sarel Pretorius, Davon Raubenheimer, Ashley Johnson, Kabamba Floors, Martin Muller, Francois Uys, WP Nel, Adriaan Strauss (k), Coenie Oosthuizen. PLAASVERVANGERS: Ryno Barnes, Lourens Adriaanse, Hendrik Roodt, Johan Wessels, Tewis de Bruyn, Naas Olivier, Hennie Daniller
Skeidsregter: Mark Lawrence.
Rugby op tv
Saterdag
09:35: Highlanders t Lions (SS 1, M-Net, SHD).
11:30: Edinburg-sewestoernooi (SS 6).
11:40: Brumbies t Stormers (SS 1, M-Net, SHD).
17:05: Sharks t Waratahs (SS 1, M-Net, SHD).
19:10: Bulls t Cheetahs (SS 1, M-Net, SHD).
Sondag
08:10: Reds t Crusaders (SS 1, GDN, SHD).
11:00: Edinburg-sewes (SS 1 en om 14:00 op GDN).
15:30: Engeland t Barbarians (SS 6).)
Alles afskoptye.