Bulls ‘kan nie wag’ vir Slag van Soweto
2010-05-18 08:02
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
J.J. Harmse
Johannesburg - As die Bulls nié in Soweto se Orlando-stadion wou speel nie, sou hulle beslis nie alles uitgehaal het om eerste op die punteleer te eindig nie.
Só sê die Bulls-skrumskakel, Fourie du Preez, oor die veld waarop hulle Saterdag in die een halfeindstryd van die Super14-reeks teen die Crusaders uitdraf.
Dit sal vir die Bulls ’n eerste wees nadat hulle in 2007 en 2009 op Loftus Versfeld in halfeindstryde tuis gespeel het.
“Ons weet al ’n geruime tyd dat ons daar sou speel, so dit is nie nuus vir ons nie. Die ouens sien regtig uit daarna.
Dit is ’n fantastiese geleentheid. Ons moes dus seker maak ons eindig bo-aan die punteleer sodat ons dit kan beleef,” sê Du Preez.
Oor sy teenstanders is dié 28-jarige speler ewe opgewonde.
“Ons speel teen die Crusaders, die beste span in die geskiedenis van die reeks. Maar dit is soos ons dit wou hê. Jy wil teen die beste spanne speel en ons kry nou die kans om ons weer teen hulle te bewys.”
Du Preez meen die vorige kragmeting tussen die spanne op 7 Mei kan wel ’n invloed op die uitslag hê. Die besoekers skroom nie om te sê hulle is toe van ’n oorwinning beroof nie.
“Ons het ook baie lesse uit daardie wedstryd geleer. Hulle voel dalk hulle het genoeg gedoen om die wedstryd te wen, maar ek voel weer óns het genoeg gedoen. En óns het die wedstryd gewen, nie hulle nie.
“Almal praat van momentum, maar die Crusaders het maar een van hul laaste vier wedstryde gewen.”
Hy verwag nietemin weer ’n kwaai aanslag van die besoekers. “Ek verwag dat hulle weer baie min sal skop en weer baie dieselfde as in die vorige wedstryd sal wil speel.
Die druk gaan dié keer baie anders wees, so ek weet nie of daardie styl weer vir hulle sal werk nie.”
Hy glo ook vlugflouheid kan die Crusaders pootjie.
“Die vlugflouheid sal ’n invloed hê, maar hul ervaring sal help. Dit kan nogtans hard op hulle wees om twee keer in twee weke heen en weer te vlieg.
Met die lugdruk, veral op die Hoëveld, kom sit die vlugflouheid in die longe.” Daarenteen sal die Bulls se ruskans verlede week in hul guns tel, het Du Preez gesê.
Hy speel in sy 98ste Superrugby-wedstryd en sou hy verlede naweek in Kaapstad gespeel het, was daar die kans van sy 100ste wedstryd in die eindstryd.
“Dit maak nie saak nie. Die meeste van ons het al die minute in al die wedstryde gespeel, dus was die ‘wegbreek’ broodnodig.
Ons het die reg verdien om ’n verswakte span Kaap toe te stuur. Ander spanne het dit nie verdien nie, daarom kon hulle dit nie doen nie.”
Bly op hoogte van al die jongste sportnuus deur Nuus24Sport op Twitter te volg.
- Sport24