Bulls kan dalk weer op ’n piesangskil gly
2011-06-18 08:32
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg – Draai die horlosie 20 jaar terug.
Dít is wat die Sharks Saterdagmiddag op Loftus Versfeld in Pretoria moet doen om hul plek in die uitspeelrondes van die Super Rugby-reeks te bespreek.
Net soos in die Curriebeker-eindstryd van 6 Oktober 1990 word die Durbaniete vandag omtrent nie ’n kans gegun om die Bulls te klop nie.
Wat daardie dag op die einste Loftus gebeur het, is nou deel van die Suid-Afrikaanse rugbygeskiedenis.
Craig Jamieson se Natallers daar uit die “Last Outpost” het die Blou Bulle met hul broeke op hul knieë betrap en met 18-12 in een van die grootste opskuddings in Curriebeker-geskiedenis gewen.
Die Piesangboere het die Ligbloues met ’n slenter gevang waarin die Sharks-afrigter, John Plumtree, ’n rolspeler was.
Hy sou as flank opgedraf het, maar is deur die veel stewiger slot Steve Atherton vervang, wie se gewig gehelp het om die Noord-Transvalers voorlangs aan bande te lê.
Plumtree het wel later sy verskyning as impakspeler gemaak en wie weet, dalk voer hy vandag weer iets in die mou om die Bulls onkant te betrap.
Hy het reeds van sy kaarte op die tafel geplaas deur die Fransman Frederic Michalak as losskakel te kies en Patrick Lambie heelagter toe te skuif.
Dié twee moet die spelskeppers wees.
Lambie is gebore 11 dae nadat die Natallers in 1990 skokgolwe deur Ligblou-land gestuur het.
Saterdag wil hy sy eie hoofstuk of twee in die Sharks se geskiedenisboeke skryf.
Soos die Bulls egter die afgelope paar weke speel, is die enigste wip waarin hulle vandag gevang gaan word een wat hulle self kan stel. En daardie wip se naam is oorgerustheid.
Die wisselvallige Sharks sal die tuisspan nie sommer klop nie, tensy die Bulls nie gefokus is nie en reeds dink aan ’n vlug Australasië toe vir ’n kwarteindstryd.
Net minder as ’n maand gelede het die Bulls die Sharks met 32-23 in Durban geklop, maar dit was veel meer oortuigend as wat die telling – en twee drieë elk – aandui.
Die Bulls se sege verlede week in Kaapstad oor die Stormers en die Sharks se gesukkel teen die Lions dui oënskynlik daarop dat ’n aand van feesvieringe in die Bulkraal voorlê.
Maar baie spanne is al in die verlede aan die slaap gesus deur te glo ’n sege is in die sakkie voordat hy nog toegeknoop is.
Vra maar vir “Baas” Naas en sy pêlle oor daardie dag in 1990.
Hulle sou dit nog nie vergeet het nie.
Vir die jongste sportnuus volg Nuus24Sport op Twitter.
– Sport24