Bulls-glipse onder loep
2011-02-21 08:58
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria - Gelukkig vir die Bulls kan al die glipsies wat hulle amper ’n sege teen die Lions gekos het met harde werk op die oefenveld reggestel word.
Só glo die Bulls-breier, Frans Ludeke, nadat sy rugbyspan vir 40 minute meedoënloos die fondament vir ’n sege gegrawe het en toe in die volgende 40 minute amper daarin geval het voordat die sement ingegooi is.
Die Bulls kon geen punte in die tweede helfte aanteken in hul sege van 24-20 nie, is kwaai by die afbreekpunte gestraf en het selfs ’n geelkaart weens swak dissipline gekry.
Tussen alles deur moes hulle ook hul doellyn verbete teen ’n vasbeslote Lions-span bewaak en kon die tuisspan twee keer deur die besoekers se verdedigingslinie bars.
“Dit gaan oor die beskerming van die bal as jy dit het. Ons het in die eerste helfte die bal goed gebruik en kon selfs nog twee of drie drieë gedruk het. In die tweede helfte het ons egter te veel besit afgestaan,” het Ludeke gesê.
“Ons sal die bal beter moet beskerm.”
In dié verband het die Bulls-kaptein, Victor Matfield, sy hand skuldig opgesteek.
“Ja, ek was een wat die bal onnodig weggegee het met daardie skop van my in die tweede helfte. Dit was nie ’n goeie keuse nie,” het Matfield erken.
Volgens hom was die span se verdediging ’n hoogtepunt.
“Dit tap ’n mens as jy die heeltyd moet verdedig en die Lions het in die tweede helfte groot eise aan ons gestel.
Jy moet hulle loof vir die manier waarop hulle die bal behou het en ons moes baie duikslae uitvoer. Ek is baie trots op die manier waarop die ouens vasgebyt het.”
Die Bulls se breker-skrumskakel, Fourie du Preez, was ewe tevrede.
“Ons doelwit was om dié een deur te trek en dit het gebeur.
My skouer het ook goed gehou en dit is altyd lekker om iets soos ’n 100ste wedstryd met ’n sege af te rond.
Ons kan egter veel beter as dít speel en dit sal die komende week se fokus wees,” het Du Preez gesê.
Hy het sy 100ste wedstryd met ’n goeie vertoning gevier en veral op die verdediging talle Lions-aanvalle gestuit.
“Ons was by tye onder druk en ek is tevrede dat ek kon help om hul momentum te stuit,” het Du Preez gesê.
Ludeke sal vandag hoor wat die skade aan Gary Botha se skouer is, maar sake lyk nie te goed vir dié haker nie.
Hy het die veld ná sowat ’n halfuur in groot pyn verlaat en is deur Chiliboy Ralepelle vervang.
Die Bulls se flank, Derick Kuün, sal waarskynlik nou as plaasvervanger-haker ingespan word terwyl Botha herstel, met Ralepelle wat vir die volgende paar weke of wat die nommer 2-trui kan dra.
Kuün het in 2007 en 2008 vir die Bulls haker gespeel voordat hy teruggeskuif het flank toe.
Die Bulls is steeds sonder Francois Hougaard, maar Jaco Pretorius behoort fiks verklaar te word om Vrydag teen die Cheetahs te speel.
Danie Rossouw, wat weens ’n spinnekopbyt kort voor die afskop deur Flip van der Merwe vervang moes word, sal ook reg wees.
Bly op hoogte van al die jongste sportnuus deur Nuus24Sport op Twitter te volg.
- Sport24