Bulls dra swaar aan medaljes
2010-05-26 08:00
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria – Altesame 25 Superrugby-wennersmedaljes en 1165 wedstryde in die reeks.
Dít is die ervaring en prestasie waarop die Bulls-afrigter, Frans Ludeke, hom kon beroep vir Saterdag se Super14-eindstryd teen die Stormers in Soweto.
Op Bakkies Botha na (skorsing) is al Ludeke se vernaamste spelers boonop beskikbaar en fiks, iets wat volgens die span se kaptein, Victor Matfield, net van waarde sal wees as hulle die regte rugby in die regte gebiede speel, die besoekers onder druk plaas en hul eie kanse gebruik.
“Dit is beslis lekker om te weet ons het ’n hele paar ouens wat al daar was, maar dit gaan Saterdag niks help as ons nie as ’n span opdaag en speel nie,” het die kaptein, wat self in sy derde eindstryd sal speel, gesê.
Matfield is saam met Wynand Olivier, Morné Steyn, Fourie du Preez, Pierre Spies, Danie Rossouw, Pedrie Wannenburg, Derick Kuün en Gurthrö Steenkamp op soek na hul derde Super-wennersmedalje, met net Gerhard van den Heever en Francois Hougaard in die beginspan wat nog nie op dié vlak as wenner van die veld gestap het nie.
Hougaard is ingesluit nadat hy ’n fiksheidstoets geslaag het.
Van den Heever, wat sy skorsing van twee weke uitgedien het, is die enigste verandering aan die span wat die Crusaders geklop het. Hy speel in die plek van Jaco van der Westhuyzen, wat afskuif bank toe en Stephan Dippenaar vervang.
Van der Westhuyzen en Gary Botha het in 2007 glorie geproe en Zane Kirchner, Jaco Pretorius, Dewald Potgieter, Werner Kruger en Deon Stegmann verlede seisoen.
Volgens Matfield kan die verskil tussen die spanne die invloed van die wedstrydwenners wees. Die Bulls het veral Du Preez en Steyn in hul geledere.
“Die vaste fasette is baie belangrik, want dit bepaal in watter mate jy momentum kan kry.
“Ek verwag dat sake redelik gelykop sal wees daar.
“Die invloed van spelskeppers kan die verskil wees, maar jy moet eers die struktuur daarstel waarbinne sulke spelers kan floreer.
“Ons het ’n hele paar van daardie spelers, maar dit gaan belangrik wees dat jy die grondslag lê,” het Matfield gesê.
Die kaptein glo ook dat die beste twee spanne in die reeks in die eindstryd speel.
“Dit is nommer een teen nommer twee op die puntelys.
“Albei het ook hul halfeindstryde met goeie vertonings gewen en albei het momentum aan hul kant. Voeg daarby dat dit twee tradisionele vyande is en Noord teen Suid. Dit voorspel alles ’n grote.”
Die Bulls-span (met Super-wedstryde) is: Zane Kirchner (39), Gerhard van den Heever (16), Jaco Pretorius (26), Wynand Olivier (70), Francois Hougaard (15), Morné Steyn (72), Fourie du Preez (98), Pierre Spies (55), Dewald Potgieter (30), Deon Stegmann (38), Victor Matfield (108, k), Danie Rossouw (101), Werner Kruger (41), Gary Botha (72), Gurthrö Steenkamp (65).
Plaasvervangers: Bandise Maku (20), Bees Roux (30), Flip van der Merwe (18), Derick Kuün (55), Jacques-Louis Potgieter (31), Jaco van der Westhuyzen (53), Pedrie Wannenburg (112).
– Sport24
Bly op hoogte van al die jongste sportnuus deur Nuus24Sport op Twitter te volg.