'Bulls dalk Saterdag gevaarliker as wat baie dink'
2010-05-11 06:40
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - Pasop. Die Bulls kan Saterdag gevaarliker wees as wat baie mense dink wanneer hulle met ’n verswakte span teen die Stormers op Nuweland uitdraf.
Dít is die mening van twee oud-Springbok-rugbyspelers van die Westelike Provinsie, Schalk Burger sr. en Eddie Andrews.
Ander Kaapse oud-Bokke meen ook dit is ’n goeie besluit deur die Bulls om hul topspelers ’n ruskans te gee nadat hulle reeds verseker is van die boonste plek op vanjaar se Super14-punteleer. Die laaste ronde se wedstryde word die naweek gespeel en die Stormers kan die halfeindstryd misloop indien hulle teen die Bulls verloor.
Burger, pa van die Stormers-kaptein, Schalk Burger, het gesê hy dink die Bulls gaan amper gevaarliker wees omdat baie van die nuwe spelers hulself sal wil bewys, nie net vir die Bulls nie, maar ook vir die Springbok-keurders.
“Dit maak nie saak wie die Bulls kies nie, die Stormers sal eenvoudig beter rugby moet speel.”
Volgens Eddie Andrews, voormalige WP- en Springbok-stut, sal die Bulls-spelers wat al heel seisoen op die bank sit graag speelkans wil kry en kan hulle dalk gevaarliker wees.
“Hulle sal ook graag momentum wil behou. Dit gaan ’n verrassing wees watter span Saterdag op Nuweland gaan uitdraf.”
Divan Serfontein, gewese WP- en Springbok-kaptein, het gesê dit is die regte besluit vir die Bulls.
“Hoekom beserings waag in ’n wedstryd wat jy nie hoef te wen nie? Die Stormers sal natuurlik teen die beste span wil speel en dit mag dalk ’n antiklimaks vir die span en sy ondersteuners wees.”
Oor die momentum wat die Bulls moontlik kan verloor deur ’n verswakte span Kaap toe te stuur, het Serfontein gesê dit is ’n risiko wat hulle sal moet neem.
Theuns Stofberg, ook ’n voormalige Springbok-kaptein, het gesê dit is verstaanbaar dat die Bulls só ’n besluit geneem het omdat hulle reeds na die halfeindronde deurgedring het.
“Dit is goed vir hul spelers op die plaasvervangerbank. Dit gaan nie vir die Stormers makliker wees om te wen nie en behoort hulle te motiveer.”
Volgens Louis Koen, voormalige WP- en Springbok-losskakel, moet ’n span ’n geleentheid aangryp om sy spelers in ’n kompetisie soos die Super14 te laat rus.
“Dit is belangrik om die spelers ’n fisieke en geestelike blaaskans te gee. Die Bulls se bestuur is uitgeslape.
“Die spelers sal reg wees vir die halfeindronde. Veral met dié groep spelers sal hulle dit kan deurstaan.”
- Die Burger