'Bryan Habana steeds beste vleuel in die wêreld'
2011-02-25 09:13
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - Bryan Habana is die beste vleuel ter wêreld. As iemand ’n paar seisoene gelede daardie stelling gemaak het sou niemand hom skeef aankyk nie, maar die Stormers se agterlyn-slyper, Robbie Fleck, het dit Donderdag hier in die Moederstad opnuut voor die aanvang van die Stormers se Super Rugbyveldtog beklemtoon.
“Daar is niemand anders wat ek eerder op vleuel vir ons sou wou sien nie. Bryan is die beste vleuel ter wêreld,” het Fleck gesê.
“Hy het geweldig baie gehalte en is puik op die oefenveld vir ons.
Hy begaan dalk een of twee foute, maar dis net omdat hy soveel doen.
“Mense vergeet van sy ongelooflike werkverrigting en ek is baie tevrede met hom.”
Habana se rekord van 44 drieë in 75 Super Rugbywedstryde en 38 drieë in 68 toetse getuig inderdaad van ’n speler wat as een van die grotes van sy generasie erkenning behoort te kry.
Saterdag op Nuweland is dit hy teen die Lions se aanwins van die Vrystaat, Lionel Mapoe, met die besoekers se jongeling wat dit natuurlik as ’n gulde geleentheid sal beskou om sy aanspraak op ’n eerste Groen-en-Goue trui te versterk.
Daardie tweestryd sal natuurlik afhanklik wees van baie ander faktore, hoewel die vleuels tog ’n sleutelrol sal hê om te speel.
Habana moet ook die rol van mentor by die Stormers vertolk, want Danie Poolman maak op regtervleuel sy buiging in Super Rugby.
Die 21-jarige produk van Paul Roos Gimnasium het verlede jaar sonder om ’n skop pale toe te mik die negende meeste punte in die nasionale o.21-liga aangeteken nadat hy 17 drieë vir die jong Streeptruie ingeryg het.
Fleck voel Poolman en die ander jongeling wat sy buiging in die Stormers se agterlyn in dié reeks maak, Gary van Aswegen, het genoeg in die voorseisoen gedoen om hul plekke in die span te verdien.
“Gary hou daarvan om die wedstryd te beheer. Hy is kalm, begaan nie baie foute nie en het ’n puik aangee.
“Ons wil hê ons losskakels moet balverspreiders wees,” het Fleck gesê.
“Danie is ’n groot vleuel wat goed afrond. Hy het ook goed in die voorseisoen gevaar, maar hopelik kan ons die bal meer by hom uitkry.
“Super Rugby sal ’n trappie hoër wees vir die jong manne, maar hulle besef die tyd om besluite te neem, sal minder wees.
Hulle het egter saam met gesoute spelers geoefen en speel saam met ervare manne.”
Vir die jongste sportnuus, volg Nuus24Sport op Twitter.
- Sport24