Bokke ‘kan baat vind by JP-skuif’
2012-02-07 09:23
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg. – ’n Kragonderbreking het die Sharks se rugby-proefwedstryd verlede Vrydagaand kortgeknip, maar nie voordat JP Pietersen gewys het hy het wat dit verg om ’n goeie buitesenter te wees nie.
Hul afrigter, John Plumtree, wil nie nou al té opgewonde raak nie, maar glo dit kan selfs vir die Springbokke goeie nuus wees as Pietersen ’n suksesvolle skuif na die nr. 13-trui kan maak.
“Ek is versigtig oor wat kan voorlê, maar met die leemte wat gelaat word met Jaque Fourie se skuif na Japan, kan JP dalk net die speler wees wat daardie gaping kan vul,” het hy gesê.
Die laaste kwart van die Sharks se proefwedstryd kon nie plaasvind nie, aangesien die stadion in donkerte gehul was.
Pietersen se goeie vertoning as buitesenter én sy kombinasie met Meyer Bosman was van die ligpunte van die proefstryd.
Bosman was uitstekend, terwyl die jong Fred Zeilinga ook die kans as skrumskakel gebruik het om die aandag op hom te vestig. Hy het ’n puik individuele drie gedruk deur 60 meter ver onder sy teenstanders uit te hardloop en hy en die Fransman Frederic Michalak het besonder goed gekombineer.
Die veteraan-flank Jacques Botes het gewys hy is nog glad nie reg om net eenkant toe gegooi en van vergeet te word nie.
As oopkantflank het hy eintlik ’n veel beter vertoning gelewer as die nuwe kaptein van die Sharks, Keegan Daniel.
Die jong slot Pieter-Steph du Toit wat selfs in ’n stadium flank gespeel het, was baie woelig en het niks gedoen om sy jong reputasie te skaad nie.
Die stryd tussen die slotte gaan intens wees, met Ross Skeate, Alistair Hargreaves, Anton Bresler en Jandré Marais wat almal goed ingeklim het.
Plumtree kry Vrydagaand op Kingspark in Durban teen die Boland die kans om nog kombinasies op die proef te stel. Aanstaande Vrydagaand in Port Elizabeth wil hy teen die OP-Kings met die span speel waarmee hy op 24 Februarie in die Sharks se eerste Super-wedstryd, teen die Bulls in Pretoria, wil uitdraf.
Vir die jongste sportnuus volg Nuus24Sport op Twitter.
– Sport24