Blues-breier in spervuur voor Sharks-stryd
2012-04-10 10:00
In-diepte Verslae
Die skrumskakel Piet van Zyl het twee keer vir die Cheetahs oorgeduik in hulle oorwinning oor die Reds in Bloemfontein.
Die Cheetahs se afrigter, Naka Drotské, het die versoeking weerstaan om Heinrich Brüssow in die 15-tal te kies vir die stryd teen die Higlanders.
Johannesburg – Die Sharks het ’n hele paar kreukels om uit te stryk ná hul frustrerende nederlaag Vrydag teen die Hurricanes, maar hul volgende teenstanders trap veel meer water.
In Auckland is die ontevredenheid oor die Blues se gesukkel in vanjaar se Super-rugbyreeks só groot dat daar reeds oor moontlike opvolgers vir hul afrigter, Pat Lam, bespiegel word.
As die Blues Vrydag in Auckland teen die Sharks vasval, kan Lam se kop op ’n blok wees.
Slegs die Lions het die seisoen ’n swakker vertoningslys as die Blues. Voor die aanvang van die reeks is verwag dat die Blues een van die pasaangeërs sou wees.
Geen Nieu-Seelandse afrigter is al in die verloop van ’n seisoen die deur gewys nie, maar Lam kan dié statistiek verander as sy span nie gou verbeter nie.
Op webwerwe word die name van Vern Cotter, wat Clermont-Auvergne in Frankryk afgerig het, en Joe Schmidt, ’n voormalige afrigter van Leinster in Ierland, genoem.
Ook Graham Henry, wat die tuig as All Black-afrigter ná die verowering van die Wêreldbeker neergelê het, se terugkeer word bepleit.
Lam het aan RadioSport in Nieu-Seeland gesê hy gaan nie sy span met die gebakte pere laat deur te bedank nie.
“Ek bly gefokus op die werk wat gedoen moet word en dit beteken baie vir my. Waar ons lê (puntelys), maak nie net myself nie, maar ook die span seer.
“As my spelers my vra om dit te doen (te bedank), dan is dit ’n ander saak. Ek het vertroue in die steun wat ek geniet en die raad was fantasties,” het Lam gesê.
Sy span se laaste nederlaag was Donderdag, teen die Rebels in Melbourne.
Lam se enigste oorwinning vanjaar was oor die Bulls op Loftus Versfeld – toe die bottelgooiery van ’n Bulls-ondersteuner dié geleentheid ontsier het.
Om as ’n besoekende span op Loftus te wen, sit nie in enige span se broek nie en dit sê iets oor die potensiaal van die Blues.
Dit is hoe die Sharks dit vandeesweek sal moet benader.
’n Herhaling van die gebrekkige afronding en dissipline soos teen die Hurricanes, sal die Sharks in die sop kry.
Die Springbokke Patrick Lambie en Bismarck du Plessis behoort darem hul terugkeer tot die beginspan te maak.
Lambie kan Frederic Michalak as losskakel vervang nadat eersgenoemde twee wedstryde weens ’n mondbesering misgeloop het.
Du Plessis is as ’n voorsorgmaatreël vanweë ’n bobeenbesering slegs as plaasvervanger teen die Hurricanes gebruik.
Hy het perdfris gelyk toe hy later in die wedstryd op die veld gestuur is.
Vir die jongste sportnuus volg Nuus24Sport op Twitter.
– Sport24
