Beserings looi Sharks
2011-05-24 09:05
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg - Die Sharks sal Saterdag sonder twee van hul Springbokke – en dalk selfs ’n derde – moet klaarkom in hul Super Rugby-wedstryd Saterdag teen die Waratahs in Durban.
Die vleuel Odwa Ndungane het sy hand gebreek en sal ten minste ’n maand langs die kantlyn wees.
Die vaskopstut Jannie du Plessis het ’n gedeeltelike mediale skeur aan sy regterknie opgedoen en sal ook sowat ’n maand lank nie kan speel nie.
Die senter Adrian Jacobs sukkel met ’n enkelbesering wat hom dalk ook uit die Waratahs-stryd kan hou. Hy moet Donderdag ’n fiksheidstoets aflê.
Die Springbok-kaptein, John Smit, het darem Maandag volstoom aan die oefening deelgeneem en sal oorweeg kan word vir die kragmeting met die manne van Sydney.
Volgens Ewoudt van der Linde, die Sharks se spandokter, het Ndungane sy hand reeds in die eerste helfte gebreek, waarna dit verbind is en hy voortgespeel het.
Hy is in die tweede helfte in die plek van Louis Ludik na heelagter geskuif.
Dié boorling van die Oos-Kaap se spel was, ondanks sy gebreekte hand, een van die min ligpunte in ’n andersins baie oninspirerende Sharks-span.
Hy sal binne die volgende paar dae ’n operasie ondergaan.
Daar is aanvanklik gevrees dat Du Plessis se kniebesering veel erger kon wees as wat uit die skandering geblyk het.
Anders as met die Bulls se Bok-skrumskakel Fourie du Preez, het Du Plessis nie die mediale ligamente heeltemal geskeur nie, maar slegs gedeeltelik.
Die nuus uit die Sharks-kamp is dat hulle oorgehaal is om te vergoed nadat hulle naam weggegooi het teen die Bulls die afgelope naweek.
Hulle is glo kwaad vir hulself oor dié onbeholpe vertoning en die magdom foute wat hulle begaan het.
Hulle het talle strafskoppe afgestaan en ook die een bal ná die ander aangeslaan.
Hulle is vasbeslote om sake Saterdag teen die Waratahs reg te stel en terug te kom op die wenpad.
Vir die jongste sportnuus volg Nuus24Sport op Twitter.
- Sport24