Bakkies hoor vandag
2010-05-18 10:01
In-diepte Verslae
Die beseerde losvoorspelers CJ Stander en Dewald Potgieter kan straks gekies word vir die Bulls se Super-stryd teen die Chiefs in Hamilton.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
J.J. Harmse
Pretoria - Die Bulls is teen dié tyd al geskool daarin om vir belangrike wedstryde met ’n swaard bo die kop voor te berei.
Verlede seisoen dié tyd is die Maandag-oefening vir die halfeindstryd teen die Crusaders sonder twee eerstekeuse-spelers gehou omdat Bakkies Botha en JP Nel in tugverhore besig was.
Dié keer was dit net Botha wat in formele klere - en sy spanmaats buite op die oefenveld in oefenklere en meeste kaalbolyf - gesweet het, maar hy sal eers vandag saam met hulle hoor wat sy lot gaan wees nadat hy vir ongeoorloofde spel uitgewys is en gister voor SA Rugby se dissiplinêre voorsitter, Peter Ingwersen, moes verskyn.
Die uitspraak word eers vandag gegee, maar te oordeel aan die drie en ’n half uur wat die verhoor geduur het, kan die uitspraak dalk soos verlede jaar, weer die kollig werp op Botha se manier van rugby speel.
Op die veld het sake veel makliker verloop, hoewel daar nie minder as in die raadsaal gesweet is nie.
Die Bulls-groep is slaggereed en ná die ruskans van die afgelope week was skete soos verwag kon word, feitlik afwesig.
Boonop was John Mametsa en Jaco Pretorius, wat die Kaapse stryd weens beserings misgeloop het, op hul pos en die spandokter Org Strauss was vol moed dat hulle oorweeg sou kon word.
Met Gerhard van den Heever, wat die kragmeting weens ’n skorsing misloop, is die kollig juis op regtervleuel en beide Mametsa en Pretorius het rolle te speel in dié verband.
Frans Ludeke, afrigter, het die luukse om Pretorius saam met sy mede-Springbok, Wynand Olivier, as sentermaats in te span, wat Mametsa saam met Deon Helberg, Jaco van der Westhuyzen en Stephan Dippenaar in die wedloop vir die nommer 14-rui laat.
Dippenaar is self ’n keuse aan Olivier se buitekant, want Jacques-Louis Potgieter, wat laas teen die Crusaders daar gespeel het, sal sekerlik as versekeringspolis bank toe geskuif word waar hy as adjudant vir Morné Steyn gaan waarneem.
Die wysheid van die ruskans is deur Strauss bevestig.
“Daar is ’n paar ouens wat wel in die Kaap gespeel het wat sukkel met skete, maar die res is slaggereed.
“So ook Jaco en John en hulle sal oorweeg kan word,” het Strauss bevestig.
Pretorius en Dippenaar het saam met Olivier geoefen en vir die blondekop is dit ’n groot verligting dat hy op die veld sal wees.
Olivier het verlede jaar se halfeind teen die Crusaders misgeloop toe hy sy heup beseer het, maar sal in Soweto uitdraf.
Te oordeel aan hoe die span gister met groot oorgawe geoefen het, gaan daar weer sowat 14 veranderinge aan die beginspan wees, met Dippenaar of Van der Westhuyzen wat die beste kans het om weer vir die Bulls uit te draf.
Die Bulls oefen vandag die eerste en enigste keer in die Orlando-stadion.
Bly op hoogte van al die jongste sportnuus deur Nuus24Sport op Twitter te volg.
- Sport24