Bakkies dink net aan wen
2011-06-16 07:19
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pretoria
“Dit voel soos gister toe ek in daardie eerste rugbywedstryd vir die Bulls teen die Hurricanes hier op Loftus uitgedraf het.
“Ek kan byna nie glo dis dié naweek 100 nie. Net soos toe, sal ek weer my beste vir die Bulls gee.”
Aan die woord is Bakkies Botha, wat Saterdag hier teen die Sharks die vyfde Bulls-speler word wat in 100 wedstryde vir dié span speel.
“ ’n Mens weet nooit wanneer dit jou laaste wedstryd is nie. Ons het al vanjaar in die Super Rugby-reeks gesien hoe beserings ouens se planne kan ontwrig. Ek glo dit is deur die genade van Bo dat ek hier uitgekom het. Ek dink dit was die regte besluit om nie Saterdag teen die Stormers te speel nie, want my knie was nie lekker nie. Dit beteken dat ek my 100ste wedstryd voor my tuisskare kan speel,” sê Botha.
“Ek is bly om dit saam met Victor Matfield en Fourie du Preez te deel, want hulle speel van die begin af saam met my en was self al daar.”
Botha wys daarop dat dié mylpaal slegs gevier kan word as die Bulls ’n oortuigende oorwinning behaal. “Nie ek of die span sal hierdeur meegevoer word nie. Ons het ’n groot taak om te verrig en dis om ’n goeie Sharks-span te klop.”
Botha is tevrede met sy spelpeil en is veral trots op die feit dat hy nog nie vanjaar enige geel- of rooikaarte gekry het nie – iets wat voorheen gereeld gebeur het.
“Ek doen my bes om die slegte gewoontes uit my spel te hou. Ek is eintlik ’n rustige mens van die veld af, maar tussen die vier lyne glo ek om die spel met toewyding te speel. Ons het nie talente gekry om net 95% daarvan te gebruik nie,” sê Botha.
- Die Blou Bulle-Maatskappy het bekend gemaak dat sowat 1 000 kaartjies weer beskikbaar is. Dit sal vandag van 08:00 af by die kaartjieskantoor by Loftus Versfeld te koop wees.
Die maatskappy het ook bevestig dat Francois Hougaard se kontrak eers in Oktober 2012 verval en dat enige bespiegeling dat hy vir ’n ander unie gaan speel, onwaar is.