Andries Bekker nie ge-Kaap
2011-02-04 08:02
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad - Butch James het vandeesweek met ’n straler in Johannesburg aangekom, maar die Goue Leeus Rugbyunie se diep sakke kon Andries Bekker nie oorreed om ook sy gewig en lengte by die Lions in te gooi nie.
Dié Springbok-slot het vandeesweek aan Sport24 gesê dat hy onlangs sy kontrak met die Westelike Provinsie tot einde volgende jaar verleng het.
Dit het gevolg op hardnekkige gerugte sedert verlede jaar dat hy op die Goue Leeus Rugbyunie (GLRU) se inkopielys was.
“Nuweland is my plek. Dit was lekker om Vrydagaand van die veld af te kom en applous van die mense te kry,” het Bekker gesê.
“Dis lekker om terug te wees en ek dink nie ek sal ooit van Nuweland af skuif nie.”
Wat van die gerugte oor die Leeus se belangstelling in hom? “Die aanbiedinge was daar, maar die Kaap is maar my plek. Ek het weer tot einde volgende jaar geteken en gaan nie sommer êrens heen nie.”
Bekker het Vrydagaand ’n suksesvolle terugkeer gemaak in die Stormers se sege van 15-0 oor die span van die Lions in ’n voorseisoense vriendskaplike wedstryd in die Neo Africa-reeks.
Hy het hom verlede jaar met puik spelpeil as een van die voorste slotte ter wêreld gevestig, en daar was selfs sprake dat hy Victor Matfield in die Springbok-span kon vervang.
Bekker het egter ’n rugoperasie ondergaan en die wedstryd teen die Lions was vir hom ’n eerste, tentatiewe tree terug na groot rugby.
Hy lei die Stormers Saterdag in Schalk Burger en Jean de Villiers se afwesigheid in die vriendskaplike wedstryd teen die Sharks op Nuweland.
Met Anton van Zyl wat vroeg verlede week sy skouer in ’n oefening beseer het, is Bekker se fiksheid en teenwoordigheid sommer van die begin van die seisoen af van groot belang vir die Stormers.
Die groot vraag is natuurlik hoe lank dit hom gaan neem om weer daardie fenomenale atleet te word wat verlede jaar in Nieu-Seeland selfs met die All Blackslotlegende Colin Meads vergelyk is.
Bekker se doelwitte is vir eers beskeie.
“Ek wil my eerstens weer in die span vestig.
“Anton het verlede jaar ’n uitstekende seisoen gehad, dus is my eerste doelwit om die nr. 5-trui weer myne te maak,” het die Kaapse reus gesê.
“Dan hoop ek weer op ’n seisoen soos verlede jaar.
“Elke ou moet maar sy kans afwag vir die Bok-trui.
“Victor het al oor die honderd toetse gespeel en is steeds die beste ter wêreld, so ek moet maar vir my kans wag. Ek is nog jonk genoeg.”
Intussen het die Springbok-senter Jean de Villiers ook aangedui dat hy graag by die WP wil bly, eerder as om ná vanjaar se Wêreldbeker-toernooi oorsee te gaan speel.
“Ja, beslis. Ek is besig met onderhandelinge,” het De Villiers gesê toe hy gevra is of hy dit oorweeg om ná vanjaar nog in die Kaap te bly.
De Villiers twyfel of daar einde vanjaar ’n groot uittog van topspelers uit Suid-Afrika sal wees.
“Ek dink die mense dink baie meer spelers sal oorsee gaan as wat regtig gaan gebeur.
“As die WP my wil hê, sal ek beslis bly.
“Dis my eerste opsie,” het hy gesê.
“Al die ouens geniet dit hier en wil by die WP bly om deel van hierdie handelsmerk te wees.
“Ons het as spelers al onderling gesels en wil almal graag deel daarvan wees.”
Bly op hoogte van al die jongste sportnuus deur Nuus24Sport op Twitter te volg.
- Sport24